أحمد شامي عن دور المتحرش في "بيت عز": كنت متخوف منه

بسملة سعودي
أحمد شامي عن دور المتحرش في بيت عز

تحدث الفنان أحمد شامي، عن دوره في حكاية “بيت عز” من الموسم الثاني من مسلسل “إلا أنا”، الذي عرض على شاشة “dmc”، وعن ردود أفعال الجماهير على الشخصية، وعن قضية التحرش التي يناقشها هذا العمل.

قال “شامي”، خلال لقائه ببرنامج “مساء dmc” مع الإعلامي رامي رضوان: “أول ما عرفت إن الشخصية متحرش، كنت متخوف جدا، لأن أنا بعيد تماما عن الحتة دي الحمد لله، لغاية بليل لقيت الأستاذ أمين بيبعتلي بيقولي روح امضي بكرا كأنه عارف إني قلقان”.

نرشح لك: يده ضخمة.. سارة الشامي تروي تفاصيل ضربها من ياسر جلال في “رحيم”

أضاف: “هي طبعا قضية يعني للأسف موجودة في مجتمعنا، ونفسي إن الموضوع ده يكون لناس كتيرة بالذات الرجال، إن هما يبقوا عارفين لو حد عمل كدة إزاي بيأثر في البنت أو الست اللي بيحصل فيها كدة، مش مجرد إن أنت ممكن تقول كلمة، التحرش ده ممكن يبقى نظرة، ممكن يبقى لمسة، يبقى كلمة بتتقال وأنت ماشي في الشارع واحدة معدية من قدامك تقوم قايلها أي حاجة، لأ دي حاجة بتأثر في البنات كلهم”.

استكمل: “لازم يبقوا عارفين إن ده زي ما أنت بتعمله، ممكن يحصل في أمك أو أختك أو زوجتك أو أي حد، وهي بتتأثر ومبتتكلمش وممكن متقولكش على حاجة زي كدة إن دي حاجة هي مأثرة فيها نفسيا”.

تابع: “أرجو إن الرسالة اللي الكتاب كتبوها، وإحنا عملناها إن هي توصل للناس، والموضوع ده يبتدي يقل في الشارع المصري على قد ما نقدر لأن بجد الستات دول كلهم بناتنا وأخواتنا ومن عائلاتنا، حاجة بتبقى تقيلة على النفس، أنت بالنسبالك كلمة قولتها وخلاص، متعرفش هي ممكن يحصلها إيه، ممكن لقدر الله تتعقد من الشارع، من الرجالة اللي في الشارع”.

أحمد شامي عن دور المتحرش في بيت عز

يذكر أن حكاية “بيت عز”، بطولة سهر الصايغ، رشدي الشامي، أحمد شامي، صفاء الطوخي، سلوى محمد علي، تامر نبيل، عصام السقا، وإخراج أحمد يسري.

يذكر أن الجزء الأول من مسلسل “إلا أنا”، عبارة عن دراما مستوحاة من قصص حياتية وفكرتها للكاتب يسري الفخراني، تدور أحداثه في 60 حلقة، وهو عبارة عن مجموعة من القصص المستقلة، كل قصة منها تدور في 10 حلقات، وتسرد تلك القصص وقائع وأحداثا حقيقية في معظمها تتعرض لموضوعات تهم المجتمع بصفة عامة والمرأة بصفة خاصة.