سالي عبد السلام باكية: "كان هيتكتب كتابي الشهر ده بس متمش"

دنيا شمعة

ذكرت الإعلامية سالي عبد السلام، أنها كانت في حالة نفسية سيئة خلال الفترة الماضية، وما ساعدها على تخطيها هو قصص متابعي البرنامج.

قالت “سالي” خلال تقديمها برنامج “قصة حقيقية”، مساء الاثنين، عبر شاشة القناة الأولى المصرية: “كتير كنت باجي التصوير الفترة اللي فاتت معيطة، وبالذات الشهر ده لأني كنت ممنية نفسي إن هيتكتب كتابي وأتجوز، بس الموضوع ممشيش لأن أغلبية اللي بنعرفهم مبقوش أد المسؤلية ومبقوش رجالة”.

نرشح لك: خصوصية وتنوع وحكايات.. أبرز ما يميز “قصة حقيقية” لـ سالي عبد السلام

أضافت: “يمكن ربنا خد مني حاجات كتيرة أوي ومكنتش متخيلة أنها تتاخد مني وفي الوقت ده، بس أنت عوضتني يا الله ومش عاوزة حاجة تانية.. شكرًا على ثقتكم وعلى جبر خاطركم وشكرًا أني رجعت أشتغل في بلدي تاني، شكرًا أني لو هيتقال في يوم من الأيام أني عديت جمب ماسبيرو.. ده كتير عليا أوي يا رب، شكرًا أن كل اللي حواليا رزق”.

أردفت: “عاوزة أشكر كل واحد في البرنامج وكل القائمين عليه، أنا حاسة إن النهارده ربنا جبر بخاطري جامد أوي.. أني أسمع الرقم ده، هي دي الحقيقة وهي دي القصص الحقيقية، هو ده اللي بنعمله في الحياة وبنستناه في الآخرة”.

استكملت: “كل أما تبقى حاسس أنك عاوز تعيط روح طبطب على حد بيعيط.. كل حاجة راحت مننا مكانتش بتاعتنا، هفرح وهضحك وهرجع زي الأول ومش همني نفسي بحاجة، وهخلي أهلي يشوفوني مرتاحة وسعيدة، لأن محدش يستاهل”.

اختتمت باكيةً: “أنا بشكركم عشان النهارده أنا هنام مبسوطة وفرحانة، هنام وأنا مرتاحة وعلى الأقل هحس إني جبرت بخاطر شوية ناس حتى لو كان العدد قليل، بس على الأقل قدرت أعمل حاجة”.