أحمد شبكة يكتب: ع الأصل دوَّر (3).. ألف ليلة وليلة

طبعا ماحدش فينا ماسمعش وما يعرفش حكايات ألف ليلة وليلة (والملك السعيد ذو الرأي الرشيد شهريار والست شهرزاد ذات الخيال الجامح والحكايات التي لا تنتهي) واللي بيتنازع على نصوصها وحمولتها المعرفية ونسبها لنفسه الثقافة الهندية والفارسية والعربية، واللي ثبت أخيرا إنها نصوص متشعبة وتنتمي لحضارات متعددة وعلى فكرة كل ده مش موضوعنا.

موضوعنا هو أصل ارتباطها برمضان واللي كان البحث عنه مش سهل وتواريخه نادرة.

المهم، تبدأ الأسطورة مع تولي السيد “محمد أمين حماد” قيادة الإذاعة المصرية عام ١٩٥٣ ووصل له نسخة هدية من ترجمة ألف ليلة واللي تحمس لها جدا وراح مكلف اتنين فطاحل مسؤلية تحويلها للإذاعة:

أولهم الأستاذ الكبير طاهر أبو فاشا واللي أخلص للموضوع جدا لدرجة أنه كتب ٨٠٠ حلقة (أيوة تمانية و جنبها صفرين) على مدار ٢٦ سنة.

وتانيهم أبو الاطفال وأبو الإذاعة وأبو الفصاد وأبو كل حاجة حلوة سمعناها في عمرنا كله وهو “محمد محمود شعبان” بابا شارو”، وبمناسبة بابا شارو أطرف معلومة ممكن تعرفها عنه إن أصل شهرة بابا شارو كان غلطة مطبعية.

نرشح لك: أحمد شبكة يكتب: ع الأصل دوَّر (2).. الفوازير

اه والله واللي حصل إنه مذيع شاب في الإذاعة ومخلص قوي في شغله فإذا بمذيع برنامج الأطفال غاب لسبب أو لأخر يقوموا يطلبوا من المذيع الشاب يدخل يقدم الحلقة بداله ويقول حاضر، اسم حضرتك إيه؟ إسمي “بابا شعبان” يقوم اللي بينقل على الآله الكاتبة يعمل أجمل غلطة في تاريخ الاذاعة و يكتبها “بابا شارو” ويفضل لمدة أكتر من ٢٠ سنة بعدها يقدم برنامج الأطفال بابا شارو…

نرجع لأصلنا بتاع ألف ليلة وتنطلق في رمضان من عام ١٩٥٥ بصوت العظيمة “زوزو نبيل” في دور شهرزاد والعظيم “عبد الرحيم الزرقاني” في دور شهريار وتصل إلي ١٠٠١ حلقة بالتمام والكمال كتب منهم حوالي ٨٠٠ طاهر أبو فاشا وكملهم بعده كتاب تانيين أشهرهم عباس الأسواني.

طبعا طبعا وزي كل نجاح إذاعي سرق التليفزيون ألف ليلة وليلة اللي كلنا فاكرين إن شريهان بدأتها مع فهمي عبد الحميد وكاريما و حاليما وفاطيما ١٩٨٥ لكن سبقهم للشاشة للي هيفتكر شهرزاد الجميلة “نجلاء فتحي” وشهريار القمر “حسين فهمي” من كتابة عمنا أحمد بهجت سنة ١٩٨٢.

واللي مش فاكرها أكيد على الأقل هيفتكر التتر اللي بصوت سميرة سعيد، احكي يا شهرزاد احكي لشهريار اشغلي له ليله لطلوع النهار.

المقال سرح وطول مننا ولازم نختصر ونقول: اتعملت عشرات إن لم تكن مئات الأعمال في مصر بس من وحي ألف ليلة وليلة من رغدة لـ ليلى علوي ومن مدحت صالح للفخراني ليوسف شعبان ولا اعتقد إن فيه ممثل مصري ماشاركش في عمل يمت بصلة لليالي.

اخر حاجة نقولها إن موسيقى ألف ليلة بدأت في الإذاعة بمقتطفات من أوبرا شهرزاد لكورساكوف وتصدي لها في أعمال بعدها على سبيل المثال لا الحصر الأساتذة الكبار الموجي وسيد مكاوي وعمار الشريعي وعمر خيرت وياسر عبد الرحمن وغيرهم كتير.

هنا أدرك كاتب المقال الصباح وسكت عن الكلام المباح ومنتظر إضافتكم ومعلوماتكم وذكرياتكم عن ألف ليلة وليلة.

و إلى أن نلتقي مع الأصل الجاي أتمنى لكم صيام مقبول وسحور خفيف وليالي رمضانية ممتعة.