إيمان سراج تكتب: "عمال نادي الشمس.. قلبي معاكم"

بعد الصدى الكبير الذي حققه الحديث عما يحدث داخل نادي الشمس في الوقت الراهن، وقرار مجلس إدارة النادي طرح بدائل متعددة لتمويل مشروعات التطوير، تمهيدًا لاختيار المقترحات الأنسب بما يحقق مصلحة النادي وأعضائه، نستكمل سلسلة المقالات بالحديث عن عمال النظافة بالنادي، باعتبارهم جزءًا لا يتجزأ من كيانه.

ونبدأ هذه السطور بشكوى أحد عمال النظافة بنادي الشمس، الذي كشف عن معاناته ومعاناة زملائه:

أولًا: عمال نادى الشمس اللي بيحافظوا على نظافتنا، مين بيحافظ على كرامتهم؟

بالأمس، وأنا في النادي، أكتر من عامل وقفني وعرفني إنه عارف إني بكتب مقالات "أكيد من صورتى على المقال" المهم انهم طلبو مني بكل أدب إني أتكلم عن مرتباتهم. طلب بسيط، لكنه وجعني؛ لأن وراه ناس بتشتغل وتتعب، وفي آخر الشهر بتكتشف إن تعبها مش قادر يوفّر لأسرها أبسط احتياجاتها.

* صحيح إحنا كأعضاء لدينا مشاكل نريد حلًا لها، لكن هؤلاء يحتاجون إلى تلبية مطالبهم أيضًا ولهم الأولوية.

عامل مسؤول عن بيت ومراته وفرضًا 3 أطفال، مرتبه 4000 جنيه في الشهر.

إحنا بنتكلم عن 4000 جنيه، مش علشان نوفّر بيهم رفاهيات، لكن علشان أسرة كاملة تحاول تعيش بيهم شهر كامل.

العمال دول هما اللي بنشوف أثر شغلهم كل يوم في نظافة النادي
شغلهم جزء أساسي من الصورة اللي بنفتخر بيها، ومن حقهم إننا نفتكر إن ورا كل مكان نظيف إنسان بيتعب، وورا كل إنسان منهم بيت فيه أطفال مستنيين حقهم في حياة كريمة.

السؤال مش بس إزاي عامل يعيش بـ4000 جنيه؟ السؤال كمان: إزاي نرضى إن اللي بيحافظ على نظافة نادينا، يبقى عاجز عن توفير أبسط احتياجات بيته؟

عمال نادي الشمس مش طالبين رفاهية، ولا بيطلبوا صدقة من حد

عمال نادي الشمس بيطلبوا مقابلًا عادلًا لتعبهم، ومرتبًا يحفظ كرامتهم ويكفي احتياجات أسرهم الأساسية.. وأعتقد إن من حقنا، كأعضاء في النادي، نسأل عن أوضاعهم.

 ونطالب بمراجعة مرتباتهم بما يتناسب مع تكاليف المعيشة، لأن احترام النادي لأعضائه لازم يمشي جنبًا إلى جنب مع احترامه لكل إنسان بيشتغل فيه.

نظافة النادي مسؤولية العمال، لكن كرامة العمال مسؤولية الإدارة.

بالصدفة البحته فى يدى الآن ميزانية سنة 26/27 موجود فيها بند مرتبات ومكافآت 95 مليون جنيه طيب من حق أعضاء النادي يعرفوا إزاي المبلغ ده بيتوزع، وإيه نصيب العمال منه، وإيه نصيب المكافآت والبدلات، ومين بيحصل عليها وعلى أي أساس.

تعالو نحسبها بالأرقام

- فرضنا ان عدد العمال 200 عامل

- مرتب العامل الواحد: 400 جنيه شهريًا.

- مرتبات 200 عامل في الشهر: 4000 × 200 = 800 ألف جنيه.

- مرتبات الـ200 عامل في السنة: 800 ألف × 12 = 9 ملايين و600 ألف جنيه.

*يعني لو افترضنا إن في نادي الشمس 200 عامل، كل واحد بياخد 4000 جنيه شهريًا، فإجمالي مرتباتهم السنوية كلهم 9.6 مليون جنيه.

طيب نقارن ده بميزانية الـ95 مليون جنيه:

- يعني مرتبات الـ200 عامل مع بعض تمثل حوالي 10.1% بس من مبلغ الـ95 مليون جنيه!!!

المفارقة اللي تستحق السؤال هي إن 200 عامل "عدد افتراضى ممكن يزيد أو يقل" ممكن يشتغلوا طول السنة، ويحافظوا على نظافة النادي وخدماته، بإجمالي مرتبات سنوية أقل من عُشر الـ95 مليون جنيه

ثانيًا.. بند التليفونات، البالغ مليون جنيه
بحسب قراءتي للميزانية، أعتقد يحتاج توضيحًا لتفاصيله وطبيعة المصروفات اللي داخلة تحته وما طبيعة المكالمات التي تحتاج إلى مليون جنيه في السنة!!

ثالثًا.. بند المكافآت الرياضية
55 مليون جنيه مكافآت شاملة للمدربين والإداريين، بالإضافة إلى 20 مليون جنيه بدلات وحوافز ومكافآت رياضية،

هنا السؤال مش بس عن حجم الإنفاق، لكن كمان عن الفرق بين البندين، ومعايير الصرف، والنتائج الرياضية المحققة التى يتم صرف مكافآت لها.

*ملاحظة، فريق كرة القدم فى دورى الدرجة الرابعة: أعتقد الأفضل تسريحه لأن وضعه حاجه تكسف!

رابعا: مرسى مطروح: 20 مليون جنيه مصروفات مقابل 20 مليون جنيه إيرادات.

 من حق الأعضاء يعرفوا تفاصيل المصروفات، وإيه اللي بيخلّي تكلفة تشغيل المنتجع توصل للرقم ده، خصوصًا مع وجود إيرادات من الحجوزات.طيب، إزاي منتجع تابع للنادي يحقق إيرادات بـ20 مليون جنيه، وفي نفس الوقت مصروفاته توصل لـ20 مليون جنيه كاملة؟ والأعضاء أصلًا بيدفعوا مقابل الحجز، مش بيروحوا يقضوا إجازتهم مجانًا

إحنا مش بنفترض إن المنتجع لازم يحقق أرباح، لكن من حقنا نفهم إزاي فلوس النادي بتتصرف، وإيه أوجه الإنفاق بالتفصيل. خصوصًا إن الأعضاء بيدفعوا بالفعل مقابل الحجز ومش مبالغ قليله، وبالتالي لازم تكون فيه شفافية كاملة في حساب تكلفة تشغيل المنتجع.

ليس هناك مجال للتشكيك ولكن لأنها فلوس الأعضاء، فمن حقهم يعرفوا راحت فين، واتصرفت على إيه، وإزاي اتحسبت!!

نرشح لك:

إيمان سراج تكتب: ماذا يحدث في نادي الشمس؟

إيمان سراج تكتب: النزاهة "المحجوبة" في نادي "الشمس"

  إيمان سراج تكتب: شكرًا رئيس نادي الشمس.. ولكن!