إيمان سراج تكتب: ماذا يحدث في نادي الشمس؟
هو نادي الشمس بقى مشروع استثماري ولا لسه نادي للأعضاء؟!
خلينا نتكلم بصراحة، لأن اللي بيحصل محتاج وقفة حقيقية من كل عضو في نادي الشمس.
في وقت تجديد الكارنيهات، في شهر فبراير أو مارس، زادت الرسوم السنوية بحوالي 350 جنيه، على حد علمي. ولسه ما عداش كام شهر، نفاجأ إن فيه 350 جنيه تاني مطلوبين من كل كارنيه، بحجة إن النادي رجعت له أرض، وإن فيه مشروع توسعة وإنشاء جزء جديد من النادي، ومحتاجين فلوس علشان يبنوه!
طيب، معلش، عندي شوية أسئلة من حق أي عضو يسألها.
أولًا: ليه العضو هو اللي يدفع تكلفة مشروع توسعة النادي؟
هل لما العضو اشترك في نادي الشمس، كان متوقع إنه كل شوية يدفع مبالغ إضافية علشان يمول مشروعات جديدة؟ وهل دي مسؤولية العضو أصلًا، ولا مسؤولية إدارة عندها ميزانية لازم تشتغل في حدودها؟
ولو فيه مشروع جديد، ليه ما يتنفذش على مراحل، حسب الميزانية المتاحة؟ ليه لازم يتبني كله مرة واحدة، وليه الحل الأسهل دايمًا هو إننا نمد إيدينا في جيب العضو؟
ثانيًا: هو إحنا مش دفعنا بالفعل؟
حسب ما أُعلن، فيه أرض رجعت للنادي، والمفروض إنها فرصة للتوسع وتحسين الخدمات المقدمة للأعضاء.
طيب، ليه العضو يدفع علشان يبني على الأرض دي، وبعد البناء تتحول المساحات الجديدة لمشروعات مؤجرة تحقق إيرادات؟ يعني العضو يدفع تكلفة الإنشاء، وبعد كده جهات أو مستثمرون يدفعوا إيجارات مقابل استغلال الأماكن دي، وفي النهاية العضو نفسه ممكن يضطر يدفع علشان يستخدم الخدمات الموجودة فيها!
هو إحنا كأعضاء دورنا إيه بالضبط؟ نمول المشروعات، وبعد كده ندفع علشان نستفيد منها؟!
ثالثًا، وقبل ما نتكلم عن التوسعة، محتاجين نسأل سؤال أهم: إيه اللي حصل للمساحات والخدمات اللي كانت موجودة أصلًا في نادي الشمس؟
النادي اللي كان فيه مساحات خضراء، وأماكن مفتوحة للأطفال، وملاعب يقدروا يلعبوا فيها، ومكان للعجل، ومكان لتعليم السواقة، وسينما، وأنشطة ومساحات كتير كانت بتخلي العضوية ليها قيمة حقيقية.
دلوقتي، بقى فيه إحساس إن النادي بيتحول تدريجيًا لفود كورت وكافيهات ومحلات ومساحات مؤجرة، على حساب المساحات المفتوحة اللي كانت جزءًا أساسيًا من تجربة العضو.
آه، لازم نقول الحق: فيه اهتمام بالنظافة، والأشجار، وشكل النادي العام، ودي حاجات إيجابية ومطلوبة. لكن هل ده كفاية علشان نقول إن فيه تطوير حقيقي؟
فين الإنجازات اللي العضو بيحس بيها في حياته اليومية؟
أنا كعضوة، لو عايزة أمارس رياضة أو هواية، بدفع فلوس إضافية. ابني لو عايز يتعلم سباحة، بدفع. ولو طفل صغير عايز يلعب كرة قدم، ممكن يضطر يستأجر ملعب علشان يلعب!
طب أنا مشتركة في النادي ليه؟!
هل العضوية بقت مجرد كارنيه بدفع علشانه كل سنة، وبعد كده أدفع تاني على كل نشاط، وكل لعبة، وكل مساحة، وكل خدمة؟
فين قيمة العضوية؟ وفين حق العضو في إنه يستمتع بالنادي من غير ما يحس إن كل حاجة حواليه بقت مشروع استثماري لازم يدفع علشانه؟
رابعًا: لو النادي محتاج يزود إيراداته، هل الحل دايمًا يكون على حساب الأعضاء؟
النادي عنده بالفعل مساحات بتتأجر، ومشروعات بتقدم خدمات بمقابل مادي. فمن حقنا نسأل عن الإيرادات دي بتروح فين، وإزاي بتتوزع، وإيه اللي بيرجع منها على العضو في صورة خدمات وتطوير حقيقي.
ولو فيه أرض جديدة هيتعمل عليها مشروع، إيه دراسة الجدوى؟ وإيه التكلفة المتوقعة؟ وإيه العائد المنتظر؟ وهل العائد ده هيكون لصالح النادي وأعضائه فعلًا؟ ولا إحنا هندفع النهارده، وبعد كده نشوف مشروعات جديدة بتجيب إيرادات، من غير ما نحس إن مستوى الخدمات المقدمة لينا بيتحسن بالشكل المطلوب؟
دي مش أسئلة تعجيزية، ولا اعتراض لمجرد الاعتراض. دي أبسط حقوقنا كأعضاء.
أنا مش ضد التطوير، ومش ضد التوسعة، ومش ضد إن النادي يستثمر في أرضه. أنا ضد إن التطوير يبقى على حساب العضو في كل مرة!
أنا ضد إن كل ما الإدارة تقرر تعمل مشروع جديد، يكون أول حل هو فرض رسوم إضافية، من غير ما نفهم بوضوح ليه، وإزاي، وإيه العائد اللي هيرجع علينا.
أنا عايزة أشوف تطويرًا يحافظ على المساحات الخضراء، ويرجع قيمة الأنشطة، ويوفر أماكن حقيقية للأطفال، ويخلّي العضو يحس إنه في ناديه، مش في مول تجاري كل ركن فيه مشروع استثماري.
عايزة أشوف ميزانية واضحة، وخطة معلنة، وأولويات منطقية، ومحاسبة على النتائج. ولو فيه مشروع تكلفته كبيرة، يتنفذ على مراحل حسب الإمكانيات، بدل ما نحمّل الأعضاء تكاليف إضافية كل شوية.
وفي النهاية، عندي سؤال واحد:
لو العضو هو اللي هيدفع علشان الأرض تتبني، وبعد كده الأماكن تتأجر وتحقق إيرادات، والعضو نفسه هيفضل يدفع مقابل ممارسة أنشطته واستخدام خدمات النادي، يبقى إيه بالضبط الميزة اللي بتعود عليه من كل ده؟
إحنا مش بنطلب حاجة زيادة عن حقنا. إحنا بنطلب إن نادي الشمس يفضل ناديًا لأعضائه، مش مجرد مجموعة مشروعات استثمارية الأعضاء بيمولوا تطويرها، وبعدين يدفعوا علشان يستفيدوا منها.
قبل ما تطلبوا من العضو يدفع 350 جنيه زيادة، قولوا لنا بوضوح: الفلوس دي هتروح فين؟ وإيه اللي هيرجع للعضو مقابلها؟ وليه العضو هو اللي بيموّل التوسعة من الأساس؟
نادي الشمس مش ماكينة تحصيل فلوس. نادي الشمس ملك أعضائه، ومن حقهم يفهموا، ويسألوا، ويحاسبوا.