مايان السيد: بخاف أكون وحيدة

تحدثت الفنانة مايان السيد عن بداياتها في التمثيل منذ الطفولة، مشيرة إلى أنها كانت تستخدمه للهروب من الواقع وكوسيلة لجذب الانتباه.

قالت "السيد" خلال لقائها ببرنامج "ABtalks"، الذي يقدمه الإعلامي أنس بوخش،: "موضوع التمثيل عندي من وأنا صغيرة، كنت بمثل قدام قرايبي وكانوا بيطلعوني أرقص على الترابيزة في الأفراح".

أضافت: "هو كان الهروب بالنسبة لي، وفي نفس الوقت كان الطريقة اللي هتخلي الناس تركز معايا، فمن هنا قررت أبقى ممثلة، وبابا كان أكبر داعم ليا".

كما تحدثت عن أصعب لحظات حياتها قائلة: " أصعب مرحلة مريت بيها في حياتي من سنة لما بابا وماما كانوا هينفصلوا، وكنت عاملة عمل مكنتش راضية عنه أوي، وكنت حاسة إني مش ناجحة وتايهة ولوحدي ومش محبوبة وبأذي نفسي، اتكسرت أوي".

أشارت: "بخاف من أني أكون وحيدة، لأني بحس دايما أني مبعرفش أعمل صحاب، ومش متشافة صح ومش مفهومة، وبخاف أحس بالوحدة وأنا مع الناس.. نفسي يكون عندي ناس شبهي في حياتي".

اختتمت: "كنت بخاف من فكرة الموت وبعدين تصالحت معاها، حسيت إن جسمي جزء من الطبيعة، لأن لما الروح بتطلع بتروح لربنا، والجسم بيروح للأرض اللي اتخلقت منها.. فيه أمان أكتر من كده!".