رد أمير منير على انتقادات ترويجه لتطبيق العمرة بالإنابة

رد الداعية الإسلامي أمير منير على الانتقادات التي طالته بعد ترويجه لتطبيق يختص بأداء مناسك العمرة بالإنابة، مؤكدا أنه أمر جائز شرعا.

قال "منير" خلال فيديو نشره عبر صفحته الرسمية على "فيس بوك": "أنا طالع أرد عشان الناس اللي قالت (نفسي أمير يرد عشان أنا بثق فيه وبحبه) أما الناس اللي بتشتمني وبتتهمني في ديني ميهمونيش في شيء والله.. أنا أطلب رضا الله فرضاك ما يهمنيش".

أضاف: "الوكالة بالعمرة؛ أن حد يعتمر أو يحج عني هو أمر شرعي بشروط؛ متوفى، عاجز، مريض مرض لا يرجى برؤه.. فقد جاء رجل إلى رسولَ اللَّهِ، قال: إنَّ أبي شيخٌ كبيرٌ لا يستطيعُ الحجَّ ولا العُمرةَ ولا الظَّعنَ، قال صل الله عليه وسلم: فحُجَّ عن أبيكَ واعتمِرْ".

تابع: "ده شرع ربنا والله العظيم، جمهور الفقهاء على جواز النيابة في الحج؛ أي 3 من الأئمة الأربعة قالوا يجوز ما عدا الإمام مالك.. لو أنا استأجرت واحد، ده طالب علم قاعد في السعودية، وأنا استأجرته يعمل العمرة، يأكل منين؟ هو سايب دنيته كلها وقاعد يتعلم قرآن وفقه ودين، فهو رايح كده كده يعمل عمرة، فهيعملها عن فلان ويسترزق والنبي سمح بذلك".

استكمل: "لو وكلتني بالعمرة وأنا خدت منك فلوس، نيتي يحاسبني عليها ربنا، وأجري كموكل بالعمرة يتوقف على نيتي؛ لو نيتي للفلوس ما أخدش أجر لو نيتي لله أخذ أجر، ده يؤثر فيا أنا ولا يؤثر في العمرة للموكلني".

أوضح: "في ناس بيقولوا "الإخوان والسلفيين بيجمعوا الفلوس".. التطبيق ده شركة سعودية مراقبة من الجهات السعودية، الموضوع لا فيه إخوان ولا سلفيين".

أشار: "هفترض معاك أني خدت فلوس في الإعلان ده، ده يضرك في إيه!.. محتاج تفكر إيه مشكلتك أن حد متدين يلبس ويأكل ويشرب كويس ويعلم أولاده تعليم كويس، مقابل كلامه عن شيء.. إيه اللي يضايقك؟!".

أكد: "لما الناس تواصلت معايا أنا حسيت أنها حاجة جميلة جدا وكنت فرحان وضايقتوني، كنت حاسس أنها حاجة هتفتح الباب للناس العاجزة والمريضة واللي أهلها متوفاه.. وموافقتش على الإعلان ده إلا لما روحت وشوفت المكان بنفسي وطريقة التعامل، وأقسمت عليهم أن ده يوصل للناس، وساعدوني إني أقدم الخدمة للناس بأسعار كويسة".

أردف: "والله العظيم أنا ما دخل لي حاجة من اللي حضرتكم هتختاروه، الفلوس للقائمين على التطبيق واللي هيعملوا العمرات".