هاني شنودة: فاتن حمامة سبب اتجاهي للموسيقى التصويرية

مريم عبد الحافظ                      هاني شنودة

تحدث الموسيقار هاني شنودة، الحاصل على جائزة الدولة التقديرية في الفنون، عن عمله مع عادل إمام، ودخوله عالم الموسيقى التصويرية بسبب الفنانة الراحلة فاتن حمامة، حينما استعانت به لعمل موسيقى فيلم “لا عزاء للسيدات”.

قال “شنودة” أثناء لقائه في برنامج “معكم منى الشاذلي” المُذاع عبر شاشة “cbc”: أظن أن أعمالي مع الفنان عادل إمام هى سبب تكريمي، فقد عملنا معًا في 12 فيلم، موضحًا: “كانت نقلة جامدة جدًا لأنه كان بينقل من الكوميدي للأكشن، وأنا كنت بتاع أكشن المرحلة دي”.

نرشح لك: أشرف زكي: لو حلا شيحة قررت ترجع هاخد رأي كل فنانين مصر

أوضح: “فاتن حمامة هى اللي دخلتني الموسيقى التصويرية، لأن المخرج هنري بركات كلمني وقالي “تونا” عيزاك في فيلم، قولتله “تونا” مين؟ أعذروني يعني أنا جاي من طنطا وبنقول فاتن حمامة مش بنقول “تونا” دي، وقولتله ليه؟ قالي هى سمعت الشريط الأول لفرقة المصريين اللي عملتلهولهم، وقالت إن إنت مدخل الحياة في الأغاني وقالت ده واد “دراماتولجي” يعني بتاع دراما، وأنا معرفش إني بتاع دراما ولا حاجة”.

تابع: “روحت أخد المقاسات وقالولي “تونا” عيزاك، لقيتها ملتني 16 ما تعملش، 16 ممنوع، ما تعمليش آلة تشيللو في المزيكا نهائي لأن الفيلم كئيب ومش عايزين نزود كئابته، وأعمل جمل طويلة مش قصيرة عشان بتنجح أكتر إلى آخره، أخدت الكشكول وأنا مُحبط لأن دي أول حاجة اعملها في حياتي وممنوع تعمل كده وكده، ركبت عربيتي الـ 128 البيضا وروحت البيت وأنا حاطط في دماغي إني هطلع أعتذر بالتليفون عن الفيلم”.

أضاف: “لكن يريد ربنا إن الكهربا تكون مقطوعة والأسانسير واقف واحنا في الدور الرابع، والدور الواحد عندنا بـ 4 أدوار، فطلعت السلم على مهلي وطول ما أنا طالع بفكر، وقولت طب ما أعمل اللي هى قالته زي السلم اللي أنا طالعه ده وأوصل لحاجة تعجبني وتعجبها، ليه لأ؟ وطلعت قعدت على البيانو وخلصت مزيكا الفيلم كله في قعدة واحدة، لأنه كان نوع من التحدي”.

أكمل: تحدثت مع فاتن حمامة وأخبرتها أنني انتهيت من الموسيقى التصويرية الخاصة بالفيلم، فقالتلي أنها ستُرسل لي “كاتيا”، ولم أكن أعلم هل “كاتيا” هذا نوع من الحلويات؟ وفي اليوم التالي وجدت امرأة طويلة ولطيفة، نصف إيطالية ونصف مصرية، اسمها “كاتيا ثابت”، أدخلتها إلى المنزل ثم تركتها وعُدت وجدتها تعزف على البيانو إحدى أصعب المقطوعات الموسيقية، ومن ثم عزفت لها موسيقى الفيلم بالكامل.

تابع: “قالتلي عندك تليفون؟ فأتصلت بفاتن حمامة وقالتلها، فاتن الواد ده عاملك مزيكا حلوة زي الحاجات الفرنساوية دي، فقالتلها أديله السماعة وكلمتني قالتلي خلاص أحجز بكرة وسجل”.

وعن سؤاله بماذا كان يُفكر أثناء عمل هذا اللحن، أجاب “شنودة”: بطلة الفيلم شخصية مترددة، كُلما اتخذت قرارًا واقتنعت به، عادت فيه من جديد بسبب المجتمع، موضحًا: “المزيكا بتقول إنها كل ما تعمل حاجة ترجع فيها، هى بتحب لكنها في بيئة عدائية بتشوف الست المطلقة على أنها آثمة بغض النظر هى بتعمل إيه، فكل ما بتاخد قرار بترجع فيها عشان المجتمع بيرجعها”.

يُذكر أن وزارة الثقافة المصرية، كرمت الموسيقار هاني شنودة بجائزة الدولة التقديرية في الفنون لعام 2023، تكريمًا لرحلته الفنية الثرية بالأعمال الموسيقية الخالدة.

هاني شنودة

رئيسية فاتن حمامة معكم منى الشاذلي منى الشاذلي هاني شنودة وزارة الثقافة المصرية