دينا: "اتجوزت 9 مرات واتخانت كتير"
قالت الراقصة دينا، إنها تزوجت 9 مرات، موضحة أنها تنافس الفنانة الراحلة تحية كاريوكا في عدد مرات الزواج، مشيرة إلى أن الرجل الذي يتحمل طبيعة عملها يجب أن يحصل على جائزة نوبل.
أشارت “دينا” خلال لقائها في برنامج “كلمة أخيرة” المذاع عبر شاشة “ON” وتقدمه الإعلامية لميس الحديدي: “اتجوزت 9 مرات، ودول قليلين، تحية كاريوكا اتجوزت 13 مرة فأنا بتنافس معاها، كانت عظيمة.. أقصر جوازة اتجوزتها قعدت سنة وأطول جوازة قعدت 5 سنين”.
نرشح لك: دينا: “بدرب رقص عشان أفضل أرقص لما تغيب الأضواء”
أضافت: “أنا لو سبت الرقص مش هبقى أنا، هبقى واحدة تانية مكسورة ومتاخد منها حاجة.. حاجتين بقولهم قبل الجواز، أنا مش هسيب الرقص، وأول ما تزهق متصاحبش حد، تعالى قولي وأنا همشي، واتخانت كتير أوي”.
أوضحت: “كان زمان الشغل بيبتدي من 9 بليل لـ 6 الصبح كل يوم، أكيد الراجل اللي يستحمل ست بالشكل ده لازم ياخد جايزة نوبل.. أنا مش من النوع اللي بواجه أنا بمشي”.
في سياق آخر، روت الفنانة دينا مواقف محرجة تعرضت لها أثناء قيامها بالرقص، منها سقوطها، قائلة: “بعض الوقعات بتبقى تلقائية وصدفة لكن بعض منها بيبقى مقصود، فذات مرة زمان واحدة كعبلتني عن قصد ورجعلتها قلتلها ليه؟ هتستفيدي إيه؟ قالت بهزر”.
أضافت دينا خلال لقاء عبر برنامج “كلمة أخيرة” الذي تقدمه الإعلامية لميس الحديدي، مساء السبت، على قناة “ON”: “مرة إتكعبلت في سلك فيديو وطرت وأنا بطبعي بقع وبقوم حتى لو موجوعة من شدة إحراجي، لأني بتكسف اوي من السقوط لازم أقوم وأكمل الفقرة، المهم لما أقع وأنا برقص أقوم عشان لازم أقف وأكمل وبعد انتهاء الفقرة كنت ببدأ اكتشف آلام وتورمات وكدمات”.
تابعت: “وأصعب الإصابات كنت عندما انزلقت وأصبت بتمزق أربطة القدم، وكنت بحط مسكن وبكمل لأن فيه ناس بتبقى منتظراني في ليلة العمر، هتعب ساعة بس ماضيعش فرحة يوم العمر لأي بني آدم”.
أردفت: “أنا بعشق الرقص وهو أكبر حب في حياتي، لكن لا يفوق حبي لابني علي، ورغم كل المسيرة دي بس لسه بخاف من مواجهة الجمهور وبعمله حساب وببقى قلقانة لسه وأنا بطلع المسرح، قبل ماشتري أي فستان وعاوزة أعرف رأي الناس، والرقص هو حياتي وبستمتع طول الوقت بالرقص وعشان كده بدرب رقص دلوقتي، عشان أفضل أرقص لما تغيب الأضواء”.
وعن نظامها الغذائي وسر رشاقتها ولياقتها، قالت: “بقالي ثلاث أو أربع أيام بجرب نظام جديد وهو أني أوقف كل العيش والألبان والفراخ والبيض، وأكل بس سمك ولحمة وعيش الردة ومربة وشوكلاتة وأيس كريم، بس مش باكل التورت ولا الجاتوه وباكل الجبن المطبوخة لكن الرومي منعناها”.