أحمد أمين ينصح بـ كتاب.. "كلمة واحدة ستغير حياتك"
نصح الفنان أحمد أمين متابعيه بقراءة كتاب عنوانه “كلمة واحدة ستغير حياتك” من تأليف “جون جوردون، دان بريتون، جيمي بيدج”
نشر “أمين” عبر حسابه على موقع التواصل الاجتماعي فيس بوك صورة لغلاف الكتاب وعلق عليها قائلا: “كتاب صغير جدا أنا خلصته في قعدة ولكن جواه مبدأ مفيد جدا وممكن يكون وسيلة تغيير لناس كتير.. واللي يعرفني يعرف إني مش مهتم بزيادة بالتنمية البشرية لكن أنا قبل ما أعرف الكتاب ده كنت بطبق اللي فيه منغير ما اقصد ولما قريته استفدت فقررت ألخص لكم الفكرة في كام سطر من شخص محب مش متخصص”
نرشح لك: اختيار أحمد أمين سفيرا لمنصة “حصص مصر”
وأضاف: “الكتاب بيقول بالبلدي: إنت محتاج تكون محدد الأهداف باختيار كلمة واحدة تكون قدام عينيك.. تكون محتاجها أو هاتكملك أو هاتشجعك أو هي دي استراتيجيتك أو موجز فلسفتك.. الكلمة دي ممكن تكون حاجة زي ( الإيمان – الإمتنان- التسليم- العلاقات- الثقة- الانطلاق-…..) مثلا
وتابع: “الكتاب بيستخدم منهج روحاني جدا في رحلة الوصول للكلمة دي وتحديدا باستخدام الدعاء والتوجه لربنا إنك تلاقي كلمتك.. طبعا مع البحث والتأمل و الصراحة مع النفس..المرحلة الأولى انك تعزل نفسك أحيانا عشان تصفي ذهنك والمرحلة التانية الدعاء والبحث ده هايوصلك إنك تلاقي كلمتك..ممكن تلاقي كلمة وتغيرها بل كمان المفروض إنك تغيرها كل سنة إنت مش بتعيش عليها طول حياتك.. لأننا بنتغير وبنتطور”.
واستكمل: “وجود الكلمة دي في حياتك بشكل واضح وانك تكتبها قدام عينك في كذا حته وتقولها لفريقك مثلا وتستخدمها كدليل وهدف.. ده بيفرق معاك جدا وبالتجربة الشخصية و تجربة ناس كتير لما بتقول السنة دي كلمتي مثلا هي (الالتزام) ممكن ما تتغيرش ١٨٠ درجة لكن فعلا بتكون أكثر التزاما من ذي قبل بسبب إنك كاتب الكلمة دي طول السنة على تليفونك ومكتبك والسرير مثلا”.
واختتم: “الموضوع ده بيتطبق على مؤسسات وشركات واحيانا دول.. و يبدو بسيط زي الكتاب كده بس تأثيره يستحق التجربة..كل سنة وانتم طيبين عموما وسنة جديدة حلوة سعيدة عليكم”