سهير رمزي تكذب حصولها على أموال من أجل ارتداء الحجاب

قالت الفنانة سهير رمزي، عن خلعها الحجاب تدريجيا إنها لا تخشى الناس لكنها تخشى الخالق فقط

أضافت “رمزي” خلال حلولها ضيفة على برنامج “السيرة”، مساء الجمعة، مع الإعلامية وفاء الكيلاني، المذاع عبر شاشة “dmc”: “هو ربنا طالب مني إني أغطى فأنا متغطية، بس الغطا اللي كنت متغطياه كان صعب في شغلي وأكل عيشي.. وقعدت 20 سنة ومشتغلتش قعدت خلاص”.

نرشح لك: اتهمت زوجها بمحاولة قتلها.. سهير رمزي تستعيد ذكرى حادث سير

أشارت إلى أنها قررت العودة للتمثيل بعد زواجها الأخير لأن زوجها رجل أعمال ووقته مشغول أغلب الوقت، كذلك بعد وفاة والدتها تركت لديها فراغا، فقررت العودة للتمثيل بالحجاب، مشيرة إلى أنها سألت واقتنعت بالرأي الذي أخبرها بأنه لا يوجد شيء في حال تمثيلها بالحجاب.

أوضحت أن مسلسلها الذي قدمته بالحجاب حقق نجاحا، لكن كلما عُرض عليها عملا كنت ترى أشياء تتطلب ضرورة تقديمها بدون حجاب، مشيرة إلى أنها قررت بعدها التخلي عن الالتزام الكامل في الحجاب في بعض المشاهد، متابعة: “قعدت مع نفسي وقولت ليه كده يا سهير، ما يا أبيض يا أسود، يا حجاب أو لا، أنتي حجابك في قلبك وفي نيتك واللي هيحاسبك مش الناس”.

تابعت: “مضعفتش لكن قناعاتي اتغيرت، ومنطقت المسألة بقناعاتي وقولت إني في سن معين مهم الاحتشام اللي أنا فيهـ مش مهم قوي حكاية الشعر”. وعن خلعها الحجاب بعد 20 عاما، قالت: “أه خلعته بعد 20 سنة لأنه زمان في عز مجدي وفي عز شهرتي كان ممكن يتبصلي قوي، لكن دلوقت أنا متجوزة وست عادية ومش صغيرة فخلاص المسألة مش الإيشارب”.

وعن الحجاب، قالت: “هو التزام وبحترمه جدا، الله أعلم ممكن أصحى الصبح أحط الحجاب تاني كل شيء ممكن”، مشيرة إلى أنها تعيش في صراع بداخلها بسبب الالتزام، مردفة: “ساعات بفكر إن ربنا سايب حاجات حلوة فينا لو كنا بنعمل حاجات حلوة ومقتنعين بيها، وهيمسكلي على دي، لأ ربنا رب قلوب ونية وتفكير وأخلاق، مش ممكن أبقى حاطة الطرحة وأنا مش فيا حاجات في اللي قولتها دي كلها، هتبقى زي قلتها الطرحة ومش معقول بقى ساعتها هيدخلني الجنة عشان أنا حاطة الطرحة، إنما بكذب وبنافق وبسرق وبغتاب مش معقول ولا تعمل حاجة الطرحة دي، طبعا الحجاب الداخلي مهم وكمان الحجاب الخارجي شكل إسلامي جميل محترم وبحترمه”.

وعن حصولها على أموال من أجل ارتداء الحجاب، قالت: “والله في عز نجوميتي هقفل على نفسي عشان مليون ولا اتنين؟! عشان أقفل القفلة اللي عملتها على نفسي دي 20 سنة وأسيب وأعتزل، دا أنا تنازلت عن ميراثي فمش منطقي يعني”.