عمرو أديب عن موقف حلا شيحة: مش مريحني بيدخلنا في دوائر مظلمة

علق الإعلامي عمرو أديب، على الجدل الدائر حول موقف الفنانة حلا شيحة بعد تبرأها من فيلم “مش أنا”، وهجومها على الفنان تامر حسني بعد طرحه فيديو كليب أغنية “بحبك” من مشاهد في الفيلم.

قال “أديب” خلال تقديمه برنامج “الحكاية”، مساء الجمعة، عبر شاشة “mbc مصر”: “حلا قررت فجأة إنها تصم الوسط الفني بالحرمانية. وطبعا حلا عندها مواقف ساعات تتحجب وساعات تقلع الحجاب وهي حرة، لكن لا يجب أنها تقرر للناس هي تعمل إيه ومتعملش إيه”.

نرشح لك: عمرو أديب: “كان في حد بيحاول إن شيرين متبقاش معانا”


أشار عمرو إلى أنه لديه رأي فيما يتعلق بما يحدث على خلفية مثل القضية التي أثارتها حلا شيحة. مردفا: “حاسس إن الحاجات دي مش صدفة موضوع حلا والبوركيني وبعدين شوية جدل عن الحجاب. حسسني إننا رجعنا لأيام زمان وفي كذا شيخ دخل على الخط، وقال ليه يا جماعة أنتوا مش واقفين مع العفة والحجاب؟! الحوار دا شوفناه من قبل”.

تابع: “هل الحاجات دي كلها صدف معرفش! بس الفار لعب في عبي فجأة حسيت كل دا مش عادي، لأنها صدف كتيرة جاية مع بعض. أنا رأيي اللي عايز يتحجب يتحجب واللي عايز يمثل يمثل واللي عايز يلبس مايوه يلبس مايوه”.

أردف: “لا حد هيحاسب ولا حد له دعوة بحد، إحنا كلنا ربنا اللي هيحاسبنا الأمر كله له من قبل ومن بعد. إنما إننا نبتدي نحط أحكام على الناس، وأنا شوفت الفيلم مفهوش شيء خارج، وماشوفتش شيء يزعج حلا قوي”.

أضاف: “طبعا معز زوج حلا دخل على الموضوع، طب لما أنتوا عندكوا مشكلة ليه كتبتوا يا جماعة، ليه معز مسعود كاتب لمراته رسالة على إنستجرام طب ما تقولها في البيت، في حاجة مش فاهمها في طقس ما مش مريحني، بس دي حاجات كانت بتحصل زمان تطلع مرة واحدة ويبتيدي المجتمع يدخل في دوائر مظلمة جدا”.

عمرو أديب وحلا شيحة

كانت الفنانة حلا شيحة، هاجمت فيديو كليب “بحبك” الذي طرحه الفنان تامر حسني وتظهر فيه بمشاهد من فيلمهما الجديد “مش أنا” مؤكدة على أنها فوجئت بطرح الكليب رغم وعد تامر لها وتأكيده احترام رغبتها.

كتبت حلا عبر حسابها على انستجرام تقول “أنا اتفاجئت جدا ًبنزول كليب يجمع فيه مشاهد متفرقة من الفيلم و في ايام ذي الحجة ايام مباركة و خصوصاً بعد اخر بوست نزلته و وضحت فيه انا ايه ..و اتفاجئت اكتر خصوصا ًبعد وعد تامر حسني ليا وتأكيده انه حيحترم رغبتي و بعض الطلبات اللي طلبتها منه بكل احترام وود الصيف اللي فات و اكدلي انه حيحترم رغبتي ..احنا يمكن نجحنا بمقايس الدنيا بس صدقوني بمقايس ربنا احنا لم و لن ننجح، انا عارفة و متاكدة ان زملائي جواهم خير بس للاسف فتنة الشهرة و النجاح مش بتخلينا نشوف ونقيس الامور صح”.

أضافت “بتكلم من قلبي الكليب ده ميرضيش ربنا و انا عيطت لاني شفت نفسي في المشاهد دي .. دي كانت زلة نتيجة ظروف مريت بيها و كلنا بنغلط و لازم نغلط علشان احنا بشر بس المصيبة اننا بنغفل و بننسى ..انا مش حتكسف من حد انا تبت من المشاهد دي و هي لا تصح و انا غلطت و بصلح و اهم حاجة ان ربنا يرضى عني لان في الاخر ده اللي حينفعنا مش الشهرة و لا النجاح لا هو مش نجاح أصلا علشان النجاح الحقيقي حاجة تانية خالص احنا اغلبنا ناسينها الا القليلين منا”.

واستطردت “الفن لو بيخلينا نبعد عن منهج ربنا و منبقاش قدوة لولادنا يبقي باطل و ميبقاش فن، احنا كلنا عندنا امتحان في الدنيا دي و حابة افكرك بالفيديو ده يا تامر اللي قولت فيه انا مش بتمنى أموت وأنا مطرب انا دايما خايف من كده.. كلام أكيد قولته في لحظة صدق جواك و جوانا كلنا، شوفه تاني يمكن يفكرك ان جواك اكيد في صراع و انا و كلنا” ووضع مقطع لرابط حوار مع تامر حسني عبر شاشة قناة دريم.

وأضافت “كلنا بنغلط بس المهم في الاخر نتدارك الغلط و نصلح .{إِلَّا مَن تَابَ وَءَامَنَ وَعَمِلَ عَمَلࣰا صَـٰلِحࣰا فَأُو۟لَـٰۤىِٕكَ یُبَدِّلُ ٱللَّهُ سَیِّـَٔاتِهِمۡ حَسَنَـٰتࣲۗ وَكَانَ ٱللَّهُ غَفُورࣰا رَّحِیمࣰا}.. الله على كلام الله وجماله يا سلام لو أصواتنا ومواهبنا كلها نستعملها في الخير عشان يبقى فن بجد”.

#حلاشيحة بين الزواج والحجاب والتمثيل.. لماذا تبرأت من فيلم #تامرحسني؟!

عيد الأضحى 2021

حلا شيحة رئيسية عمرو أديب عمرو أديب عن موقف حلا شيحة موقف حلا شيحة نيوز ليتر