عمرو أديب لـ محمد رمضان: "ربنا يجعل دعا الناس من نصيبك"

علق الإعلامي عمرو أديب على خبر وفاة الطيار أشرف أبو اليسر صاحب الأزمة الشهيرة مع الفنان محمد رمضان، والذي سمح للأخير بتصوير فيديو من داخل غرفة قيادة الطائرة.

قال “أديب” ساخرا خلال حلقة أمس السبت من برنامج “الحكاية” عبر شاشة “mbc مصر”: “عاوز أقول لمحمد رمضان إنه لازم ضميره يكون مستريح، هتضايق ليه؟.. مش عارف الناس عاوزة منك إيه، أصلك كنت دايما بتسأل عليه لما عرفت إنه اتقهر، مش غريبة عليك زي ما عملت مع الشاب اللي انفجرت فيه القنبلة في التصوير، أصلك راجل وطول عمرك راجل”.

نرشح لك: اضطر لغلق التعليقات.. انتقادات غير مسبوقة لـ محمد رمضان بعد وفاة أبو اليسر

 

تابع: “أنت أخدت دعوات يا ابني ربنا يجعلها من نصيبك، وأنت هتشوف بركة الدعا في الأيام المفترجة دي، وأديك شايف نجاحك السنة دي عامل ازاي.. نجاح ضخم يا ابني، ويومها أنا قلتلك وانت بترمي الفلوس إن ربك مش هيسيبك”.

أضاف: “حتى لما ربنا كرمك ونزلتله بوست حطيت صورته مع عمرو دياب، وبعدها سحبتها وحطيت صورة سودا.. ربنا مش هيسيبك، ابقى قابلني لو عرفت تنسى المشهد ده، النهاردة أنت تريند 1 و 2 و 3 بس جواهم إيه؟.. مش أنت بتحب التريندات؟ أهو ربنا ادالك على قد نيتك”.

أردف: “البلد دي الناس فيها مش هبلة، نفسي تقرا الكلام اللي مكتوب عنك، من كتر شكر الناس فيك قفلت التعليقات حتى، ربنا يجعل كل دعا الناس دي من نصيبك، الله يرحم أبو اليسر ويرحم حاجات تانية مفيش داعي أذكرهالك”.