أسامة كمال يهاجم غزو المنتجات التركية للأسواق
قال الإعلامي أسامة كمال في حلقة اليوم من برنامج “مع أسامة كمال”: “قلبي بيتقطع، وأنا من جيل يؤمن بالعروبة والقومية العربية، جيل اتولد في الستينات شايف كل المبادئ اللي اتربى عليها ماتت واتدفنت والكل بيقول ياللا نفسي، مش حتى زي زمان الدول العربية مش واقفة مع بعض، لأ دول مش واقفين مع نفسهم”.
نرشح لك: “عم صبحي” يكشف كواليس تكريم الرئيس السيسي له
استعرض كمال حوارا دار بينه وبين مواطن عربي قائلا: “قال لي لو هختار بين احتلال غربي أو تركي أو ايراني، موافق على التركي والايراني، ع الأقل مسلمين.. قلت له انت مجنون يا عم؟ تركي ايه وايراني ايه وزفت ايه، كله احتلال مهما كان دينه.. ازاي تقبل دة على كرامتك وعلى دينك وعلى عيلتك وعلى نفسك.. بس فيه ناس استسلمت وقبلت بالدياثة وبالخيبة القوية اللي احنا عايشينها”.
وأضاف: “هل معقول إن فيه ناس في ليبيا اللي طول عمرهم كرامتهم فووق يوافقوا ع الاحتلال العثماني ويرحبوا بيه؟ هم نفس الناس اللي كانت سعيدة بالقصف الاوروبي لبلدهم في 2011.. يا أخي القذافي كان ديكتاتور؟ عارفيين بس هل معقول في ناس رضيت بالبديل الأوروبي في 2011 والبديل العثماني في 18 و19 و20؟ اليس بينكم رجل رشيد دمه حر وحامي؟ راضي بالعثماني المحتل وبالسوري المرتزق والروسي المرتزق وغيره.. وفرحان؟ ومسمي نفسك سياسي ووطني؟ مش معقول”.
ووجه الإعلامي أسامة كمال رسالة للمشاهدين قائلا: “من 2013 وحضراتكم بتشتروا سلع ومنتجات تركي واجهزة ومفروشات، غلبت اقولكم انها دولة معادية محدش بيسمع.. قلت لكم دي دولة ارهابية بتدعم الارهاب في مصر كأنى بدن في مالطا.. تركيا بتدمر اقتصادنا والصناعة المصرية محدش عبرني.. طيب اتفضلوا اشتروا المنتج التركي أهو التركي بقى ع الباب يا باشا.. في مسئولين زعلوا مني لما قولت علي الهواء قاطعوا المنتجات التركي وقولي الاقتصاد حاجة والسياسة حاجة تانية .. مش ممكن ابقى أنا شايف احسن من الناس دي.. أكيد هم شايفين وعاملين مش شايفين، ما أنا مش عبقرينو.. اتفضلوا ادعموا اقتصاد دولة نظامها إرهابي.. دم ولادنا في رقبتكم لانكم بتساعدوا دولة الإرهاب”.
ويسعي الإعلامي أسامة كمال من خلال برنامجه فرز العديد من الأخبار بعيدا التهويل والتهوين، لتضع المشاهد والمتابع في إطار صورة واقعية وحقيقية، ويذاع البرنامج يومي الاحد والاربعاء الساعة 12.30 ظهرا.