هيثم التابعي يكتب : عن الشر المطلق لشير في الخير
أصدقاء كثير بيعملوا لشخصي الفقير، تاج ومنشن في حالات لأسر محتاجة سواء طبية أو خلافه، حثا منهم لفريق عملنا في #أبواب_الخير على التدخل والمساعدة. نية طيبة وجميلة وثقة نعتز بيها.
آخرون يرشحون حالات، يقولون إنهم يعرفونها، للمساعدة ويلحون علينا، بكل حسن نية بالطبع، لمباشرة تلك الحالات دون أدنى معرفة لهم بها وبمصداقيتها.
مجرد بوست على فيسبوك اتعمله شير مرات ومرات تحت عنوان “شير في الخير” يتعمل فيه تاج لـ 100 واحد وكل واحد يقلك “آه أعرف الحالة.. أعرفهم عن طريق فلان.. سمعت… واحد صاحبي قالي”….
وفي الأخير محدش بيكون شاف حاجة ولا يعرف الحالة والحالات بتطلع مضروبة في الأغلب.
“شير في الخير” على جهالة دة شر مطلق…. “شير في الخير” وإنت متعرفش أي حاجة عن الحالة وتقول للناس ساعدوا فلان ده شر مطلق…. ده تضييع لمجهود وفلوس في الأرض. ودعم لناس متستحقش.
الأفضل دايما إنك تكون واثق 100% إن اللي عامل البوست يعرف الحالات شخصيا واتعامل معاها.
إحنا شخصيا أي بوست عن أي حالة مش بيطلع للنور إلا بعد ما نعرف حالات اللي نعرفها بشكل شخصي ونقابلها ونزورها.
بنسال ونتقصى ونزور ونروح علشان الخير يروح لحد مستحقه… بس الوضع بقا صعب أوي اننا مضطرين نشتغل على حالات لمجرد إن ناس عاملاها شير على فيسبوك ومحدش يعرف الحالات دي حقيقية ولا لأ.
بعد تقصي بسيط لحالتين في آخر أسبوع.. اكتشفنا إنهم مضروبين رغم تأكيد اللي عملوا البوست الأصلي بتاعهم إنهم يعرفوا الحالة واتعاملوا معاهم وساعدوهم قبل كدة.
من سنتين وبالظبط في أغسطس 2014.. بدأت أشتغل على بوست (كان عامل أكثر من 10 آلاف شير) لمريضة سرطان بيجمعوا لها فلوس… حاولنا نوفر الدوا… اتواصلت مع ابنة الحالة.. قالتلي إنت جيت متأخر أوي.. ماما ماتت من سنة… واستمر الشير وربما جمع الفلوس (لا أخوّن أحد على الاطلاق)….
جزء مهم جدا من عمل الخير إننا نتبين مصارفه. نعرف إحنا بنطلع فلوسنا لمين.
نشر حالات الخير بلا تقصي مش فهلوة ومش شطارة.. الأمر مش مسابقة لنيل أكبر قدر من الشير واللايك.
رجاء محدش يعملي أو أي حد من فريق عملي تاج أو يكلمنا عن حالات إلا يكون يعرفها شخصيا واتعامل معاها قبل كدة بنفسه.. توفيرا لوقتنا وجهدنا ورغبتنا في الاستمرار.
بنقبل حالات بتبدأ من حد محتاج شمبر نظارة جديد أو محتاج كتب دراسية، ولحد إجراء عملية جراحية…. رجاء لا ترشحوا الا الحالات اللي عارفينها وإحنا تحت أمركم دوما وأبدا.
هيثم التابعي
أبواب الخير
نرشح لك – هيثم التابعي: المسايرة في الغلط مش حب يا بنات
اقرأ أيضًا:
C.A.T تتولى إدارة أعمال الفنان محمد ممدوح
البلاتوه.. من 1980 وأنت طالع
لماذا الحملة الأخيرة ضد مرتضى هى الأكثر جدية؟
خاص: نكات سياسية وراء اختفاء أبلة فاهيتا
سألنا شيماء عبد المنعم: what about الحملة العنيفة ضدك؟
القائمة الكاملة للمرشحين لجوائز السينما العربية
.