رسالة سهير البابلي لعبير صبري
وجهت الفنانة سهير البابلي رسالة للفنانة لعبير صبري بعد خلعها الحجاب، قائلة: “معلش يا عبير ارجعي تاني ربنا هيغفرلك، إنتي جميلة ولطيفة وما تسمعيش كلام حد.. عندنا إغراءات كبيرة ولكن لا يصح إلا الصحيح”.
وأضافت “البابلي” في حوارها مع الإعلامية راغدة شلهوب ببرنامج “100 سؤال”، المذاع عبر شاشة “الحياة”: ربنا قال خليكوا محترمين، وإزاي هنبقي محترمين وأنا سايبه شعري وبرقص بيه، وعاملة وسطي كده، وتابعت موجهة حديثها للفنانات: “اللي عايزه أقوله للفنانات خليكي محترمة عشان تحترمي نفسك.. واحترمي نفسك علشان الآخرة”.
وقالت إنها مع تولي العسكريين المناصب القيادية في الدولة، وتابعت: ” بيغلطوا بس جُمال وفي حاجات مبياخدوش بالهم منها، الله يكون في عونك يا سيسي من المصريين، نخلي عندنا دم شوية، وبراحة عليه”.
وأوضحت أن كثير من أهل الوسط الفني معلوماتهم الدينية ضعيفة، نافية أن يكون الفنانين بعيدين عن الدين مثلما كان في آخر 5 سنوات، مشيرة إلى أنهم أصبحوا متعمقين بشكل أكبر ويسمعون لمشايخ ودعاة.
ونوهت إلى أن التحرش الجنسي فعل فاضح ومتدني لا تقبل به، موجهة حديثها للمتحرشين قائلة: “ولاد كلب.. ترضى أمك يتعمل فيها كده؟ لازم يعلقوه وكل اللي اتحرش بيهم يعملوا في حاجات مقدرش أقولها وأنا هعمل فيه كده، لازم يدوق اللي عمله في بنات الناس”، كما وجت رسالة للفتيات قائلة: “اختشوا شوية”.
وذكرت أنها كانت تحب زمن الرئيس الراحل محمد أنور السادات، بينما كانت تخاف من من الرئيس الراحل جمال عبد الناصر رغم حبها واحترامها الشديد له، وتابعت “كنت بترعب منه رغم بساطته وعظمته”.
ووجهت رسالة للفنان أحمد حلمي قائلة: “التهريج مش كوميديا.. مش أي كلام تعمله”، مطالبة “حلمي” بتقديم أدوار ثقيلة والتنويع دراميًا لأن لديه موهبة كبيرة.