رد ليلى أحمد زاهر على الجدل المثار حول حلقتها مع هشام جمال في "ABtalks"

ردت الفنانة ليلى أحمد زاهر على الجدل الذي أثير مؤخرا عبر مواقع التواصل الاجتماعي بسبب حديثها وزوجها هشام جمال خلال حلقتهما مع أنس بوخش في برنامج ABtalks.

كتبت "زاهر" عبر حسابها الرسمي على "إنستجرام": "بحترم وبقدر ردود الأفعال واهتمامكم بس حابة أوضح كام نقطة لأن في أجزاء من الحلقة اتقطعت واتاخدت بمعاني غلط، تصوير حلقة (AB Talks) حصل وأنا في أواخر شهور الحمل، قبل التصوير إدارة أعمالنا بلغت فريق البرنامج إننا هنوصل متأخر لأني تعبت شوية، ولما وصلنا اعتذرنا لأنس وفريق البرنامج بالكامل على التأخير".

أضافت: "وإحنا داخلين الاستوديو قلت لهشام إني لسة تعبانة وطلبت منه يساعد أكتر في إدارة الحوار لأني كنت تعبانة ولأن طاقتي بشكل عام أقل الفترة دي وده شيء طبيعي".

وعن جدل حديث هشام جمال عن رغبته في الحديث مع إحدى الفتيات خلال "شهر العسل"، أوضحت: "موقف السفر حصل فعلاً، لكن بعدها لوحده اتكلم معايا وقالي إنه انتبه إنه اتصرف غلط بحكم طريقة نشأة شاب كتير وإنه نوع تصرفات محتاج تصحيح وعلاج وده كان تكملة كلامه الموجود في الحلقة الكاملة، والحقيقة إن من يومها ما حصلش موقف مشابه، وفكرة إن رجل ياخد باله ويحل ويصارح بالمشكلة ويتغير عشانك هو أكيد شيء يحترم».

كما تطرقت ليلى زاهر لجملة "أنا اخترتك" الذي قالها "جمال" وأثارت حالة من الجدل، مشيرة: "أنا كمان اخترته.. وأكيد بحبه عشان طريقة تعامله معايا وكمان تعامله في حياته ومع الناس، وأكيد عشان شايفاه الأحسن والأنسب والأحلى في كل حاجة، وسبب ذكر الجملة دي في الحلقة هو نقاش عن الغيرة، وإنه كان بيأكد لي هو ليه عمره ما بيشوف واحدة أحسن مني، مش لأنه بيشرح بطريقة متعالية زي ما الجزء اللي نزل كان بيتكتب عليه".

أكدت ليلى زاهر: "علاقتي بهشام بدأت من 4 سنين، وبقى لنا حوالي سنة ونص متجوزين وأنا أكتر واحدة عارفة تفاصيل علاقتنا وحياتنا واتفاقاتنا اللي بنحترمها وبتمشي علينا إحنا الاتنين، لكن كمان أنا عندي أمي وجدتي وأخوات وصديقات قريبين مني جدا، كلهم سيدات بخبرات مختلفة شايفين علاقتنا من قريب وعايشين تفاصيل كتير منها، وكلهم بيحترموه وبيحبوه وبيبدعونا نكمل بنفس التفاهم اللي إحنا فيه".

أشارت "زاهر": "أنا بتكلم عن شخص من يوم فرحنا لحد النهارده كل أيامي معاه حلوة، بيعاملني بكل حب واحترام وتقدير، شخص من أول يوم في حملي ما بينش في تعب، ولا سفر شغلي، ولا زيارة دكتور، لأنه حاططني أولوية في حياته وقدر يحتويّني بتغيرات مشاعري وأحاسيسي خلال تجربة جديدة علينا احنا الاتنين".

تطرقت: "أنا أقدر أحكم على اللي أنا عايشاه حاليا.. وهو إننا عدينا أول مرحلة من الجواز بيتقال عليها من أصعب المراحل، بحب وتفاهم وأتمنى نكمل كده وأحسن إن شاء الله بعيداً عن التنبؤات المتشائمة المتأثرة بانتشار العلاقات السامة واللي هيلاقوا دايما زاوية تقلب أو تحور أي شيء إيجابي لسلبية حتى الكلام اللي أنا بكتبه دلوقتي، ربنا يكتب لكل حد السعادة والراحة في حياته بطريقته".

اختتمت ليلى أحمد زاهر حديثها مطالبة الجمهور بالدعاء لهما، قائلة: "إن شاء الله تشوفونا بعد سنين أكتر، ونكون مبسوطين ومتماسكين أكتر وأقدر أنا كمان أخليه سعيد قد ما هو بيخليني مبسوطة في حياتي، أخيراً بطلب دعواتكم لينا وإحنا بنعيش واحدة من أسعد مراحل حياتنا ونستعد نستقبل أول مولود لينا إن شاء الله".