اتحاد بنوك مصر يشرح تفاصيل الشهادات الدولارية

كشف محمد الأتربي، رئيس اتحاد بنوك مصر، تفاصيل شهادات الادخار الدولارية، موضحا أن هناك نوعين من هذه الشهادات، مشيرا إلى أن هذه الشهادات سعرها عادل ومغري لمن يرغب في الحصول على فائدة عالية.

أضاف “الأتربي” خلال مداخلة هاتفية في برنامج “كلمة أخيرة” مع الإعلامية لميس الحديدي، المذاع عبر شاشة “ON”: “عندنا منتجين شهادة لو واحد عنده 100 ألف دولار، وهيربط الشهادة 3 هياخد فايدة بقيمة 7% هياخدها كل 3 شهور، وفي نهاية التلت سنين هياخد الـ 100 ألف دولار بالدولار، ويقدر يقترض بضمان الشهادة دي بالجنيه المصري 50% من قيمة المبلغ بحد أقصى لا يزيد عن 10 مليون.. يعني الشخص يقدر يقترض مبلغ بنص قيمة الشهادة بالجنيه المصري وبياخدهم بسعر فايدة مميز، لازم نبقى عارفين الغرض من الاقتراض هيربط شهادة أو هيشتري شيء”.

نرشح لك: لميس الحديدي عن تغريم “الشحات”: الأهلي لا يتهاون

أشار: “الشهادة التانية هي شهادة بقيمة 100 ألف دولار، لكن بتختلف أنه هياخد 9% لمدة 3 سنين و27% هياخدهم مقدما بس بالجنيه المصري، يعني هياخد الفايدة بالجنيه المصري”.

تابع: “الشهادات سعرها عادل ومغري للشخص اللي عايز ياخد فايدة، وياخد الفايدة بالدولار، الشهادة التانية وهي الأكثر إغراء أنه هياخد 27 ألف دولار بالجنيه المصري، في ساعتها مقدما”. مشيرا: “الحد الأدنى للشهادات دي 1000 دولار، اللي معاه ألف دولار يقدر يشتري الشهادات دي، الشهادات دي مش للمغتربين، لجميع المصريين اللي عايشين في مصر أو اللي برا أو الأجنبي اللي برا، أي مصري عنده دولار وعايز يربطه يبقى من حقه”.

لفت: “وفي قروض للمغتربين في الخارج، بالنسبة للقرض الشخصي، هياخد القرض من مصر بالجنيه المصري بضمان المرتب بتاعه بسعر فايدة مميز، بحد أقصى 3 مليون جنيه على 4 سنين، وده له شروط منها أنه يكون شغال بقاله سنتين هناك وبياخد مرتب، وناخد تعهد من الشركة أنها تحول قسط المرتب.. القرض ده هياخده بالجنيه المصري بضمان المرتب اللي برا، والقسط بتاعه يتحول بعملة البلد اللي شغال فيها”.

أردف: “وفي قرض للمغتربين يخص التمويل العقاري يسدده على 15 سنة، مفيهوش مشكلة لأنه مضمون بعقار بس هو هيحول 20% الأول بالعملة الأجنبية، وبعد كده يسدد باللي هو عايزه مصري أو عملة تانية وعنده فرصة يختار مدة السداد لحد 15 سنة، والفايدة حسب مدة سداد القرض.. وساعة ما هنتعاقد مع الشخص هنثبت سعر الفايدة وقت التعاقد”.

استكمل: “سعر الفائدة 7% مش مرتفعة أوي، لأن أسعار الفايدة ارتفعت في الفترة الماضية، والودائع في القطاع المصرفي في بالدولار كانت 47 مليار دولار في 2016، النهارده إحنا 60 مليار دولار تقريبا.. البنوك مراكزها المالية قوية وعندنا تحدي أن في سعرين للدولار، وإن شاء الله الفترة القادمة يتحسن هذا الوضع ويختفي زي ما حصل في 2016، وطول ما في فجوة بيتواجد سعرين لكن مع التحرك الإيجابي بيدي ثقة للمؤسسات”.

وعن مصدر السداد، قال “الأتربي”: “إحنا 60 مليار دولار العملاء بتاخد فوايدهم، وأي عميل بيطلب يحول دولارته برا عمر ما في بنك ما دام عنده دولار تخلف عن هذا.. وإحنا بنسلف دولارات لشركات عندنا هي عندها مصادر بالعملة الأجنبية، وبالتالي ده مصدر للعملة الأجنبية بيسدد الالتزام اللي عليا، أنا ليا مصادر بتجيلي وعلى أساسها بفتح اعتمادات، إنما اللي حاطط دولار عندي أنا مشغل هذا الدولار مع شركات أخرى عندها مصادر بالعملة الأجنبية فبيجيلي حصيلة بالدولار فمعنديش أي مشكلة، وعمر ما بنك تخلف عن تحويل أو سداد فايدة بالدولار”.

وفيما يتعلق بالوضع المالي لبنك مصر، وهل ستكون تلك الشهادات عبئا عليه، أوضح: “الفلوس اللي هتجيلي دي هشغلها، هسلفها لعميل عنده مصادر بالعملة الأجنبية، لأني مقدرش أسلف عملة”. مشيرا إلى أنه في حال وثقت الناس في الحكومة وجديتها سيكون رد الفعل على تلك الشهادات إيجابيا. مؤكدا أنهم لم يحددوا بعض المدة التي سيتوقف فيها إصدار تلك الشهادات.