حلمي بكر عن نجل حميد الشاعري: محتاج أبوه يربيه!

شدوى ممدوح

رد الموسيقار حلمي بكر، على الهجوم الذي شنه نديم نجل الفنان حميد الشاعري عليه عبر حساباته على موقع التواصل الاجتماعي “فيس بوك”، إذ كتب “مش كل ما تتزنق تجيب سيرة حميد الشاعري، تاريخك ميجيش تمن تاريخه!”.

قال “بكر” خلال مداخلة هاتفية مساء الثلاثاء، مع برنامج “آخر النهار”، المذاع عبر شاشة “النهار” مع الإعلامي تامر أمين، إنه هو من أعطى كارنيه النقابة للمطرب حميد الشاعري، بالإضافة إلى أنه من قام باختباره عندما تقدم لاختبارات النقابة. مردفا: ”بالرغم إني سألت الأستاذ حميد في امتحان النقابة عن مصطلحات موسيقية ومعرفهاش، إلا أنه خد الكارنيه عشان هو موهوب وإنسان قدم أعمال ونماذج من الغناء اللي بتحمل شخصية وملمح، وأنا اللي أديته الكارنيه بنفسي وكان موجود وقتها أحمد فؤاد وأنا نائب نقيب”.

نرشح لك: 4 أغسطس.. أسعار تذاكر حفل كاظم الساهر بالساحل الشمالي

أشار إلى أنه عندما أراد تقديم أغنية “الحلم العربي”، طلب من حميد الشاعري توزيع الأغنية، وعندما سُئل عنه من فترة قال عنه أنه أستاذ ولا شك أنه موهوب، متعجبا أين السب والقذف الذي وجهته له؟! مضيفا: “دي وأول مرة أعرف أن ابن وحيد الشاعري بيوزع، فبقت الجملة الجديدة لو عايز تشتهر أشتم حلمي بكر”.

أردف ”بكر”: ”لما الولد يقول أبويا مستعد يساعدك، لا ده كده أبوه هو اللي محتاج لمساعدة، وهو نفسه محتاج مساعدة أن أبوه يربيه”. كما أكد على أنه لم يهاجم حميد الشاعري في البرامج التلفزيونية، متابعا: “والله ما حصل، والولد هاجمني عشان دي الموضة مش ادعاء، ودلوقتي بيقولوا لو عايز تتشهر خلي حلمي بكر يشتمك ودي حصلت مع 2 مطربين واختفوا وفي مطرب بردو خلى ابنه يغلط فيا وكانت النتيجة أن ابنه اختفى هو كمان ولما يجي الوقت هقول أسمائهم”.

لفت إلى أنه يعلم لأول مرة أن نديم يقوم بالتوزيع الموسيقي، مضيفا: “يا ريته ما كان بيوزع ولا بيلحن ولا بيغني، واللي بيعمله ده داخل في سكة رخيصة، والولد ده محتاج يتربى أوي”. مؤكدا على أن الموسيقيين يتقبلون المدارس المتنوعة في الغناء، إذ أن حميد الشاعري جاء بلون غنائي مختلف وخفيف على الشباب. متابعا: “ولكن مظهر الفن كان لا يليق بجوهره، ده كان بيطلع لابس ترينج وشبشب أو كوتشي مقطع وهو ده اللي وصلنا إننا بقينا نسمع شاكوش وبنسة ومفك، إحنا في مأساة بجد”.

أكد حلمي بكر أنه يحمل كل مشاعر الحب والتقدير للفنان حميد الشاعري، متنيا له الشفاء. وأردف: “بس وربنا بيشفيه يا ريت يجيب ابنه ويعلمه إزاي يرد على الكبار وعلى الأقل أبوه موهوب، إنما هو موهوب بالشتيمة!”.

أشار ”بكر” إلى أنه دائما ما يتحدث عن حال الغناء وليس عن شيء آخر، لافتا: ”أنا لما بطلع أتكلم، بتكلم عن حالنا الغنائي لأن ده علم وإحنا دلوقتي بقى عندنا ثقافة الجهل اللي وصلت الأميين لقيادة الغناء في مصر، بالرغم من قانون النقابة اللي بينص على أن المطرب لازم يجيد القراءة والكتابة، ولما يجي حد يغني وهو ملهوش في الغناء وتتشكله لجنة من 6 أعضاء ويسقط فيجيبوله دكتور ويقولوا هنعلمه الغناء، وهو الغناء بيتعلم؟ وأنا بقول للأستاذ هاني شاكر أنت حد علمك الغناء؟”.

يذكر أن نديم نجل الفنان حميد الشاعري، كان قد هاجم الملحن حلمي بكر، بعد انتقاده لوالده خلال ظهوره في إحدى البرامج التلفزيونية.

كتب ”نديم”عبر موقعه الشخصي على موقع ”فيسبوك”: ”أستاذ حلمي لو محتاج مساعدة الكابو مش حيتأخر عليك، لكن ما ينفعش كل ما تتزنق تروح برنامج تجيب سيرة حميد الشاعري اللي للأسف تاريخك ميجيش تمن تاريخه ولا فنيا ولا أخلاقيا للأسف، 30 سنة من عمري ما بيعملش حاجة في حياته غير التقليل من الناس ومن الفنانين ومن أعمالهم”.

أضاف: ”اوعى حضرتك تفتكر إنك محطوط فى خانة الإنسان المحنك، لا للأسف أنت عِبرة لكل نفسية فاسدة منتهية الصلاحية فنيًا وأخلاقيًا، فرق التربية كبير أوي بينك وبين الكابو حتى في الفكر الموسيقى والمعاملة مع الناس، الكابو كبير مقامه ومش بيرد عليك عشان هو أكبر من كده وأكبر منك بالذات ودائمًا يقول لي ما تردش على حد، لكن ولاده كبروا، ولن يسمحوا لك إنك تقطّع في أبوهم”.

تابع: ”هو حضرتك بجد فاكر أن حميد هو اللي بوظ المزيكا فى مصر؟! المقسوم إلى حضرتك بتتكلم عليه هو اللي واكل بقاله 30 سنة مع كل الفنانين و هو سر الإستمرارية و النجاح، مفيش ألبوم بينزل غير و مقسوم الكابو رانن فى الودن، لما مذيع صابغ شعره أبيض وفي اللفة يسئلك سؤال زي ده، المفروض ردك يبقى تربوي قبل الفني إنه إزاي يسئل السؤال بالطريقة دى لكن حضرتك كنت حتطير من الفرحة عشان السؤال فى تقليل للكابو، حاول يا أستاذ حلمى تكسب الناس عشان الدنيا فانية، متبقاش خسران السيرة الطيبة وكمان الناس”.