الليثي عن إعلان عطر عمرو دياب: بتلعبوا على أحلام الشباب
علق الفنان محمود الليثي بطريقة طريفة على إعلان عطر الفنان عمرو دياب الذي تم طرحه مؤخراً.
نشر محمود الليثي عبر حسابه الشخصي على موقع تبادل الصور والفيديوهات إنستجرام، مقطع فيديو، وكتب: “إعلان عمرو دياب الخارق للطبيعة هيجنني”.
نرشح لك: محمود الليثي ينتقد الشهرة المزيفة
قال “الليثي” خلال مقطع الفيديو، إنه إعلان جميل وأعجبه، مضيفا: “إعلان البرفيوم الجديد ألف مبروك يا عمرو ربنا يجعلها فاتحة خير عليك وإن شاء الله ربنا يكرمك، أنت تعبت كتير وآن الأوان بقى نعمل مشاريع بقى وننبسط”.
تابع: “إن شاء الله خير، تبقى فاتحة خير عليك يا حبيبي، دلوقتي بالنسبة للإعلان أنا حابب أشكر المخرج طارق العريان والفنان عمرو دياب ومكتب الكاستينج اللي جاب الموديلز، يعني الله أكبر أكيد ده مش مكتب كاستينج عادي، لا ده مكتب كاستينج في متحف الشمع، مكتب كاستينج من المريخ يعني هما صوروا في دبي فأكيد طبعا ليهم صلة بالمريخ يعني، فاختيار جميل، اختيار حلو جدا، أنا مبسوط باختيار الموديلز”.
استكمل: “اللي أنا عايز اسأل فيه بقى، دلوقتي أنا لو اشتريت المنتج هيحصل معايا اللي حصل ولا إيه؟ يعني أنا حاسس الإعلان مفيهوش واقعية، يعني أنا دلوقتي ارش الرشتين وامشي جنب واحدة زي الاولانية أو التانية الاتنين حلوين يعني، امشي جنبها تروح البت لفة وفجأة أبقى في يخت ولا إيه؟ يعني هل ده واقعي ولا أنتم بتلعبوا على أحلام الشباب؟ لازم نفهم بقى الموضوع ده، يعني لو بتلعبوا على أحلام الشباب لازم ننزل بقى إعلان تاني عادي مثلا فلتت منه”.
واصل: “ولا هما أصلا الموديلز الرائعين اللي أنا بحبهم دول، ولا هما أصلا مشموش؟ يعني ممكن يكون مشموش أصلا بس هو عمرو دياب، يعني ده عمرو دياب هما جايين لعمرو مش جايين للبرفيوم، ما هو لازم برضو نفهم قبل ما نحط فلوس، لأن ده أكيد هيبقى مبلغ وقدره، يعني أروح كده اشتري واتطمن؟”
View this post on Instagram
يذكر أن عمرو دياب طرح إعلان عطره الجديد وذلك ضمن كليب أغنية “وأنا معاك” والذي تم تصويره بين دبي وأبوظبي مع المخرج طارق العريان.
وظهر عمرو دياب في الكليب من خلال مجموعة مشاهد رومانسية تجمعة ببطلة الكليب إنجي كيوان، بالإضافة إلى عدد من عارضات الأزياء المشاركات في الكليب.
نرشح لك: الملصق الدعائي الأول لإعلان عطر عمرو دياب
ومن المتوقع أن يطلق “دياب” عطره رسميا في حفل كبير بدبي خلال الفترة القادمة.