رابع أيام معرض الكتاب: تكدس شديد وطفطف جديد

محمد حسن الصيفي

طبعًا حفظت إننا في فترة معرض الكتاب في دورته الـ 49 وضيف الشرف دولة الجزائر وشخصية المعرض الكاتب عبد الرحمن الشرقاوي … ندخل في المهم وبما إننا في رابع أيام المعرض رصدنا لك الآتي:

نرشح لك: دليلك لشراء الصحف والمجلات القديمة من “سور الأزبكية”

1. من مميزات إنك تبقى محرر ثقافي إنك تعرف معلومات عمرك ما كنت هتعرفها، زي مثلا إن كلمة “طشت” أصلها الصحيح “طست” وإن المثقال “أربعة جرام وربع”، وإن سرنديب هي سيلان هي سيرلانكا هي جنة آدم، وإن مي زيادة حبت مصر حب عبادة والأدباء المصريين طنشوها بزيادة في أواخر حياتها لما دخلت “العصفورية” في لبنان “مستشفى المجانين”

2. بعد ظهور الفريسكا أول يوم لمعرض الكتاب، وظهور الطفطف والآيس كريم، ناقص البحر والكورنيش ونبقى في مرسى مطروح رسمي.

3. معرض الكتاب بدأ انهاردة بجد، طابور لا يقل طوله عن 500 متر أو ربما كيلو متر، سواق الأتوبيس قالك لما مصر كلها مثقفين أمال إيه اللي احنا بنشوفه كل يوم دا ؟

4. صالة 4 كلها كتب قانون وتحسها عاملة زي نادي أندية الشركات مهما لعبت حلو ملهاش جمهور.

5. صالة 5 بقى زي الأندية الجماهيرية ” أهرام أخبار جمهورية روزا اليوسف” مهما لعبت وحش جمهورها وراها.

6. سور الأزبكية: الوضع اتغير خالص يا زينهم، أبو 3 بقى بـ 5 وأبو 5 بقى بـ 10 وأبو 10 بقى بـ 15 مرار طافح.

7. سور الأزبكية: ثمة استعباط أصاب بائعي السور لا أدري بسبب ارتفاع الإيجار بالفعل أم لأن الاستعباط يشهد رواجه بشدة الفترة الأخيرة في الوطن.

8. سور الأزبكية: مسكت كتاب “فن المسرحية” للكاتب لاجوس أجري ترجمة دريني خشبة كنت اشتريته قبلها بيوم ب 5 جنيه بسأل من باب الفضول بقوله بكام قالي 50 ضحكت ومشيت وبعد كام متر ناداني: خد يا كابتن شكلك ناصح عايزه بكام؟

_ ب 5

: تصدق بمين.

_أكيد بالله مش بـ إليسا يا حج

: أٌقسم بالله ما العظيم ما أنت واخده “بصوت محمد هنيدي” … طلعت أجري وأنا بضحك قبل ما يضربني.

9. أسعار الإصدارات الجديدة في مستوى امتحان الفيزيا للثانوية الأزهرية.

10. سور الأزبكية: هيصادفك شوية كُتُب بدون سبب هتحسهم زي مقررات الوزارة، هيحاصروك في كل حتة “الوعد الحق .. طه حسين، تاريخ الحركة القومية وتطور نُظُم الحكم في مصر باجزائه .. الرافعي، حوار مع صديقي الملحد .. مصطفى محمود، ديفيد كوبر فيلد .. تشارليس ديكنز…سيب القوس مفتوح”.

11. بمرور الوقت انحصرت أصوات الرعب على خيمة فؤاد حداد والمسرح المكشوف.

12. المسرح المكشوف: كوميديا حتى آخر العمر “عيان بيداوي ميت” اللي ع المسرح عيان واللي بيتفرج ميت م التعب فوقف يريح شوية.

13. معنديش فكرة ليه لحد دلوقتي مفيش كتاب عن مدينة نصر ومينباصاتها وسواقين ميني باصاتها.

14. لو عندي نص قلب سواق ميني باص وهو بياخد الملفات بمنطق “اللي يفوت يموت” كان زماني موقع 4 روايات في المعرض.

15. مصر اللي في المعرض حلوة وخيالية وروحها خفيفة، مصر اللي برة .. المعرض موسى مصطفى موسى !