محمد حمدي سلطان يكتب: يوميات مشاهد رخم (٣)
– أحمد سعد غنى السنة اللى فاتت ” بحبك يا صاحبى ” والسنة دى قلب عليه وغنى ” سلام يا صاحبى ” تقريبًا صاحبه ده هيطلع ريم البارودى فى الآخر.
– أغنية كداب لمحمد فؤاد ظهرت فى الحلقة التالتة لـ ” ريح المدام ” والرابعة من ” حلاوة الدنيا ” وجارى البحث عنها فى بقية المسلسلات.
– فودافون بقت بتهتم بحشد أكبر كم من النجوم كعادتها فى إعلانها السنوى، بغض النظر عن جودة الإعلان نفسه، اللى مستواه بيقل كل سنة عن اللى قبلها.
– برغم ضعفه الفنى، وفكرته الساذجة، وميزانية إنتاجه المحدودة، إلا إن مسلسل ” ريح المدام ” هو أفضل مسلسل كوميدى حتى الآن، من حيث معدل الضحك، فإذا كان الهدف من المسلسلات الكوميدية هو مجرد الضحك ليس إلا، فهذا العمل هو أكثر من نجح فى فعل ذلك.
– مصطفى هريدى كوميديان تقيل جدًا، لكنه للأسف يشكل حلقة جديدة فى سلسلة أصحاب المواهب المُهدرة. لديه الكثير لكى يقدمه ولكنه يتخبط ما بين اختياراته الخاطئة، ورغبته فى مجرد التواجد على الساحة، أما مشكلته الأكبر أنه لم يجد حتى الآن من يساعده على إعادة اكتشاف نفسه من جديد.
– عمر مصطفى متولى بيمتلك جينات فنية، وبذور موهبة جيدة، لكنه لا يتمتع بأى درجة من خفة الظل. لو ينسى تجربة مسرح مصر ويبتعد تمامًا عن الكوميديا، بالتأكيد فرصه فى النجاح هتكون أكبر.
– هما تقريبا عملوا مسلسل ” قصر العشاق ” عشان يقتلوا جوانا أى حنين للماضى.
– بعد مشاهدة متأخرة قليلاً، اقدر اقول ان ” حلاوة الدنيا ” هينافس بقوة على أفضل مسلسل السنة دى.
– منة شلبى ونيللى كريم وهند صبرى. التلاتة حاجة تفرح والله، بغض النظر عن أى ملاحظات لدى البعض على أدائهم، أو مستوى أعمالهم، إلا إن النضج اللى وصلوله وقدرتهم على التطور باستمرار، بتخليهم أهم 3 نجمات على الساحة حاليًا، بيعطوا قيمة و ” ثقل ” فنى لأى عمل بيشاركوا فيه.
– السنة اللى فاتت فى ” ونوس ” والسنة دى فى ” عفاريت عدلى علام ” بمجرد ما بتظهر هالة صدقى على الشاشة تلقائيًا بوطى الصوت، عشان ببقى متأكد انها ” هتصوت ” و ” تزعق ” وتتكلم بصوت عالى. تستحق عن جدارة لقب ” أكتر ممثلة مزعجة فى العالم “.
– الكوميديا اللى بيقدمها مصطفى شعبان فى ” اللهم إنى صايم ” اتلغت من أيام دكتور شديد والخواجة بيجو، الله يرحمهم ويحسن إليهم.
– باسل خياط ممثل تقيل وموهوب جدًا. لدرجة ان 75٪ من نجاح مسلسل ” 30 يوم ” بسبب أدائه الممتع، و ” كاريزماته ” المخيفة، وحضوره الطاغى، والأهم قدرته على الإقناع. ففكرة المسلسل كلها مبنية على مشهده الأول الطويل مع آسر ياسين، عندما يخبره باسل بتجربته النفسية التى سيقوم بتطبيقها عليه، نجاح باسل خياط بأدائه المتفرد فى إقناع المشاهد بهذه الفكرة الغريبة والعبثية، هو حجر الأساس الذى بُنى عليه نجاح المسلسل، وإن كان الإيقاع انخفض كثيرًا بتوالى الحلقات، إلا إن المتعة المضمونة فى متابعة شخصية ” توفيق” الشبه مختلة، تجعل قرار التوقف عن متابعته صعبًا للغاية.
– جمال عبد الناصر فى الجماعة 2 ماشى يقول لكل اللى بيقابله أنا هعمل انقلاب، أنا هعمل انقلاب. تقريبًا البلد كلها كانت عارفة انه هيعمل انقلاب ما عدا الملك فاروق.
– محمود الجندى اللى بيقوم بدور ” مصطفى النحاس ” فى ” الجماعة 2 ” وصف اللى حرقوا القاهرة بالمجرمين و ” الإرهابيين ” والسؤال. هل مصطلح ” الإرهاب ” بمشتقاته كان موجود فى يناير 1952 !
– مش قادر استوعب العودة الغريبة، والانتشار المريب فى أكتر من مسلسل للفنان عماد رشاد.
– أنا ممكن اتفهم أسباب رجوع طلعت حرب، بس مش هقدر استوعب أبدًا أسباب رجوع سهير رمزى.
– رجاء الجداوى طلبت من حفيدتها فى ” حلاوة الدنيا ” تشغلها فيلم ” إشاعة حب ” وده طبعًا علشان هى كانت إحدى بطلات هذا الفيلم الجميل.
– فى مشهد من مسلسل ” كلابش ” على قناة ” صدى البلد ” كان فيه واحد عامل دور مذيع فى برنامج. الراجل أنهى كلامه بجملة ” هنكمل كلامنا فى الموضوع ده لكن بعد الفاصل ” راحو قاطعين الحلقة وطلعوا فاصل بجد. اللى هو ما بيصدقوا يسمعوا السيرة.
– حمدى الميرغنى فى بداية الحلقة السابعة من ” فى اللا لا لاند ” قال إفيه على المهاجم الزامبى مايوكا لاعب الزمالك. وفى نفس اليوم مايوكا رد بقوة وسجل هدف التعادل للزمالك أمام اتحاد العاصمة الجزائرى فى اللحظات الأخيرة من المباراة. شكرًا حمدى الميرغنى.