ايهاب سلام يكتب: انت جيت .. يا رمضان !؟ 2016
بناء على رغبه الجماهير العريضة اللى هما السته سبعه صحابي و اتنين قرايبى و جارنا اللى فى الدور الأول و نظرا للنجاح الساحق اللى حققه مقالي الأول انت جيت .. يا رمضان !؟ فى 2015 قررت استكمل سلسله الانبهارات و أكتب مقال كل سنه بالمناسبه الجميله دي و كل سنه و انتم طيبين و على المتضرر من المقال اللجوء للقضاء أو الفضاء ايهما اسرع .
– بمناسبه دخول امتحانات الثانوية العامه أنصح أصدقائي الطلبه بعدم مشاهدة مسلسل نيللي كريم (سقوط حر) الا بعد انتهاء الامتحانات ويارب تنجحوا و نعمل (أفراح القبة) و (وعد) مني شخصيا (المغني) و كمان (الطبال) على حسابي.
– طبعا بالنسبه للساده الرجال محبي كرة القدم اللى هيتابعوا بطوله امم اوروبا (الخروج) هيبقي بمواعيد المباريات فقط و الكافيهات لازم تكون (فوق مستوي الشبهات) ولو طبعا القاعدة طولت للسحور اوعي تنسي (كلمة سر) البيت و انت مروح.
– بمناسبه اني اتكلمت عن كره القدم أتمني انه ينجح (القيصر) يوسف الشريف فيما فشل فيه (الاسطورة) قيصر روما توتي أمام النادي الأهلي المصري.
– علشان صفحات الحوادث تقل فى رمضان يبقي لازم نقبض على تجار (الكيف) حتى لو كان (رأس الغول) شخصيا، و تجار السلع التموينية اللى بيبيعوا منتجات فاسده و اي محل كمان بيغش فى (الميزان) حتي لو كانت محلات (مأمون وشركاه) ذات نفسه.
– نجاح (ليالي الحلمية) فى الجزء السادس و (الخانكة) يعتبر فعلا (شهادة ميلاد) لكل الناس اللى متمسكة بمنطقتها الشعبية القديمة حتى لو المسئولين حجزولهم فى (جراند اوتيل) اقامة شامله.
– علشان ميحصلش (أزمة نسب) و توصل الامور للمحاكم ما بين (هي ودافنشي) و نقعد نقول يا تري يا هل تري مين (أبو البنات) و اذا كانوا (بنات سوبرمان) ولا لأ. يبقي لازم نعرف الأول (يونس ولد فضة) ولا ولد الطحاوي.
– كان نفسنا نشوف (نيللي و شيريهان) الحقيقيين السنادي و بالمرة نشوف حد يحضرلنا (7 أرواح) كلنا بنفتقدهم دايما فى رمضان فؤاد المهندس، عبد المنعم مدبولي، يونس شلبي، سعيد صالح، حسن مصطفي و بكار و سوبر هنيدي.
نرشح لك : إيهاب سلام: أنت جيت .. يا رمضان!؟
