وكالعاده.. وأنا بقلب في القنوات من توك شو لآخر ، وإذا بي أفاجأ بتقرير عن رد فعل أهالي كفر مصيلحه عن برآءة مبارك! «إشطه» أنا م البلادي وأنا م البلادي غنيت وتشوقت أشوف أهل بلدي هيقولوا إيه !
يانهار أسود .. نزل عليه التقرير كالصاعقه !!
بلده تعداد سكانها قد كده ، فيها الأطباء والمهندسين ، والقضاه والمستشارين والمعلميين ، حتي ستات البيوت مثقفين .
بلده نسبة الأميه فيها «صفر»علي مستوي الجمهوريه ، تروح حضرتك تصور مع خمس ست إنفار في حاره مزنوقه ، وتقول ده رد فعل كفر مصيلحه علي برآءة مبارك !!!
أولاً إسمها كفر المُصيلحه .. (في أغنية إختارناه قالوها كفر مصيلحه علشان الوزن بتاع الأغنيه ، وراح زمن الأغاني خلاااااااص !
ثانياً لما تعوز تعمل تقرير عن رد فعل الناس عن برآءة مبارك في مسقط رأسه يبقي تكون موضوعي وتجيب اللي أيد واللي عارض ، مش تطلع كام نفر من الناس اللي بتشوف الكاميرا تزغرط وتعمم وتقولي رد فعل قريه بحالها !!!
وأنا بصفتي من أهل القريه « مش هاسمحلك » … بصوت السيسي ، تظهر اهل قريتي بالبلاهه دي ، ده ماكنش ناقص غير لقطتين من بتوع ساندرا نشأت « واحد راكب علي الحمار» والتاني « ساحب جاموسه » علشان يكمل التضليل ،،،
قصدي التطبيل ،،، يووووه التقرير .. . . الموضوعيه والحياديه والمهنيه هداكم الله !
