هو مش رايح إعارة يا حاجة.. تعليقات طريفة لياسمين عز مع أول يوم دراسي
علقت الإعلامية ياسمين عز على مظاهر أول يوم دراسي، مستعرضة أبرز الطقوس الطريفة للأسر والطلاب والمدرسين في الشوارع والمدارس مع بداية العام الدراسي الجديد.
قالت "عز" خلال برنامجها "كلام الناس"، المذاع على شاشة "MBC مصر": "الشوارع كلها النهاردة ريحتها جبنة بيضة ورومي، والبنات ريحتها زيت دابر أملا أو فاتيكا أيهما أقرب".
أضافت: "المدرسين ما شاء الله واقفين على كل باب مدرسة يشيكوا على كل راس بتدخل.. السليمة يدخلوها، واللي حالقة قصة (هدهد) ما تدخلش".
أشارت: "المدارس منعت البناطيل المقطعة والشباشب والسلاسل والحظاظات.. إحنا رايحين نتعلم يا ولاد مش رايحين حفلة (توو ليت)".
تابعت: "الأم اللي واقفة تعيط على باب المدرسة.. هو مش رايح إعارة يا حاجة، ده داخل يدرس مع السلاحف أحباب الله".
لفتت إلى أن: "الوحيدة اللي حقها تعيط هي (الميس).. عايز أشرب، آكل، أروح الحمام، حموكشة شد شعري.. الله يعينك يا جوز الميس".
اختتمت متسائلة: "الراجل أبو شيماء اللي مركب بنته على الحصان وعاملها زفة..؟ أومال في فرحها هتعمل إيه؟ هتجيبلها (الهودج) بتاع زمان و4 يجروه!".