حمادة هلال: عصام إسماعيل من أهم الملحنين في مصر

تحدث النجم حمادة هلال عن علاقته القوية بالملحن والمطرب عصام إسماعيل، مؤكدًا أن النجاح الذي جمعهما كان ثمرة صداقة حقيقية ومشوار طويل من العِشرة.

قال "هلال" خلال مداخله هاتفية في برنامج "الستات ما يعرفوش يكدبوا"، على قناة "CBC": "النجاح اللي حصل بيني وبين عصام ماكانش شغل والسلام، دي علاقة عشرة ومحبة وأخوة حقيقية.. الأغاني اللي عملناها زي (كل ما أفكر فيك) و(الحب حلو) اتولدت وسط ذكرياتنا وضحكنا وسهراتنا، مش جو شغل رسمي".

أضاف: "عصام من المطربين الجامدين جدًا قبل ما يكون ملحن، لكنه اختار التلحين في الفترة دي، ونجاحه بيثبت كل يوم إنه موهوب بجد".

وكشف هلال عن مواقف طريفة بينهما في البدايات، وقال: "كنت بعمل فيه مقالب جامدة جدًا، ويصدقها! ولو قلت له جملة لحن من سنين يفضل فاكرها، دماغه كمبيوتر بجد".

لبّى حمادة طلب جمهوره وغنى بصوته جزءًا من أغنيته "والله يا حب عمري وحياتي"، لتعمّ الأجواء حالة من البهجة والحنين.

اختتم: "أنا بحب عصام جدًا، وبفرح لنجاحه، وإن شاء الله لما أرجع من السفر أكون معاكم وأغني لايف تاني".