بعد استئصال الرحم.. حورية فرغلي: كان نفسي اجيب بنت

أمنية محمد

كشفت الفنانة حورية فرغلي عن تفاصيل خضوعها لعملية استئصال الرحم بسبب إصابتها بعدد من الأورام منذ سنوات، موضحة أن حالتها الصحية أفضل بعد العملية.

قالت “فرغلي” في لقائها مع ET بالعربي: “أنا مؤمنة بربنا، وبقضاء ربنا، ومن صغري وأنا عارفة إن عندي ورم في الرحم، وعارفة إن دي حاجة وراثة”، موضحة أن الورم كان يسيطر على الرحم بالكامل، مما أدى لاتخاذ الأطباء قرار إزالة الرحم بالكامل، واستغرقت العملية 5 ساعات، مما يعبر عن مدى صعوبة هذه العملية، وهذا ما قاله له الدكتور الخاص بعد انتهائه منها.

نرشح لك: آخرها استئصال الرحم.. 5 مآسي في حياة حورية فرغلي

أشارت: “أنا حاسة نفسي أحسن بكتير، عندي طاقة ومش تعبانة، باكل كويس، وفعلًا كان مأثر عليا”، لافتة إلى أنها خضعت لعملية على مشابهة في سن الثلاثين، وأنه كان لديها 7 أورام في الرحم، وحثها الدكتور حين ذاك أن تتزوج خلال 10 سنوات وبمساعدة طبية كان بإمكانها أن تنجب، ثم يستئصل لها الرحم أثناء الولادة، قائلة: “بس متجوزتش وشيلت الرحم خلاص”.

كشفت عن كواليس مشهد في مسلسل “حكايات بنات” جسدته بعد تلقيها الخبر، قائلة: “كنت لسه واخدة الصدمة في تصوير المشهد ده في (حكايات بنات)، وأستاذ حسين قالي هتمسكي البيبي وارتجلي وكنت عمري ما مسكت بيبي في حياتي، وقعدت أتكلم معاه كأني بتكلم مع بنتي أنا لدرجة إني في الآخر قولتلها أنا هسميكي حورية، كانت صعبة بس كنت بتكلم من قلبي بجد، كان نفسي أوي اجيب بنت”.

استكملت: “كان حلمي طول عمري، والحلم ده اتاخد مني، فمش عارفة إيه ممكن يعوض الإحساس ده، والحاجة الوحيدة اللي كان ممكن تفرحني إني كنت أجيب بيبي وده مش هيحصل”.

كما وجهت نصيحة للفتيات: “الجمال مش كل حاجة، الناس أول ما هتشوفك هتقول واو وزي القمر بس عينهم لما ياخدوا عليكي هيشوفوكي عادية جدا، اللي بيعيش فعلا هو إنك أنتي تتجوزي ويبقى عندك ولاد، دي الحاجة اللي أنا ندمانة عليها، لو رجع بيا الزمن هقول اتجوز لأن ده اللي هيعيشلي، أنا لو حصلي حاجة مين هياخد باله مني؟ مين هيحبني بشكلي ده؟ جوزي”.

ذكرت أنه هناك فنانين من الوسط الفني على اتصال بها، خاصة بعد خضوعها لعملية الرحم الأخيرة منهم: نبيلة عبيد، صفية العمري، ميرفت آمين، صفاء أبو السعود.