رامي جمال: أرفض الغناء في حفلات بها خمور وراقصات

أكد الفنان رامي جمال، على رفضه الغناء في أماكن بها شرب خمور أو تشاركه راقصات، قائلا: “برفض فكرة إني أغني في أماكن فيها شرب خمور، وعندي تحفظات على حاجات معينة، وبرفض الرقاصات برضو ومتطلعش الرقاصة معايا في فقرتي في حفلة أو فرح”.

أوضح “جمال” خلال حواره ببرنامج “حبر سري“، مساء الخميس، مع أسما إبراهيم، على قناة “القاهرة والناس”، أنه يفضل الاستحواذ على الاهتمامات لذلك لا يفضل وجود راقصات معه، مضيفا: “لو اتعمل لي مفاجأة بوجود راقصة في فرح همشي، والرقص فن في ناس بتحبه، ولكن متطلعش معايا أنا شايف اخد الاهتمام لوحدي”.

رد رامي جمال، على موقفه من تحريم الفن، قائلا: “أنا مش شيخ وأنا شايف كل الشغلات فيها الحلال والحرام، وفي شبهات ممكن الواحد يتجنبها ومش عايز أحدد الشبهات عشان لو في زملاء بيعملوها، واللي يحلل ويحرم الشيوخ وشايف أن فني أقدمه لوحدي”.

أكد على أنه من المستحيل أن يقدم ألحان لمطربي مهرجانات، قائلا: “مستحيل ألحن مهرجانات ومش ذوقي وأنا اتحاسب على اللي بعمله، ومش عايز أقدم فن أعتذر عنه بعد كده في يوم من الأيام، حتى لو الدنيا جت عليا مش هغني مهرجانات واستعين بأهلي”.

أضاف أنه من نجوم الصف الأول في التلحين ولكن ما زال أمامه الكثير من الأحلام ليحققها، متابعا: “أنا من نجوم الصف الأول ومن وجهة نظر السوق والمتعهدين صف أول ومن وجهة نظري لسه كتير على اللي حلمت به”.

استكمل: “بالنسبة للأجر بأخد أجر أكثر من ناس كتير وبحب يكون ليا أجر مختلف ولسه نجاحات كتير، وعمرو دياب نموذج والنجاح سهل الوصول له إنما النجاح متغير والمهم الاستمرارية”.