على طريقة رضوى الشربيني.. 10 علامات للرجل المتخوف من الزواج

تحدثت الإعلامية رضوى الشربيني عن علامات يجب أن تحرص الفتيات على ملاحظتها في الشخص الذي تريد الارتباط به، لكي تتأكد من جديته في العلاقة أو خوفه من خطوة الزواج.

قالت “الشربيني” خلال برنامجها “هي وبس” المذاع عبر شاشة “cbc سفرة” إن أول تلك العلامات هو عدم إشراكه لها في أي من خططه المستقبلية التي يتمنى تنفيذها، مضيفة: “لما يكون طول الوقت بيتكلم عن خططه بشكل منفرد اهربي لأن ده معناه إنه مش حاطك في حساباته ومش شايفك زوجة أو عنده خوف من الارتباط، بدل وجع القلب اهربي من دلوقت”.

أضافت: “رقم اتنين لو لقيتيه كل شوية بيسيبك ويرجعلك ويسيبك تاني ويقولك مقدرتش أبعد عنك، رقم تلاتة لو هو مابيتكلمش عن الجواز ويقف عن الحب والحنان وبس ولما تكلميه في الموضوع يسكت.. اهربي لأنه هيسيبك بالتأكيد، رقم أربعة لو هو كل ماتهتمي بيه وتطلبي منه اهتمام بيتوتر ويتراجع ويقولك أنا مبعرفش أهتم بحد”.

أردفت: “نمرة خمسة لو مش بيستثمر فيكي وقته وعاطفته ومش بيجيبلك هدايا ولا بيسأل عليكي، ونمرة ستة لو متأكده إنه بيحبك لكن هو متردد ويوم يقولك هنتجوز ويوم تاني يتكلم على البنات اللي بتحبه ويقولك إنه محتار، رقم سبعة لو لقيتيه مش مستقر في شغلانة وبياخد مصروف من أهله”.

استطردت: “رقم تمانية لو لقتيه بيركز على عيوبك وطباعك السيئة أو بيطلع عيوب مش فيكي، رقم تسعة لو هو بيتكلم عليكي مع أهله وأصحابه بطريقة مش كويسة يبقى هو بيمهد لأسباب إنه هيسيبك، وأخيرا اللي بيطلب من حضرتك تغيير هيئة حضرتك”.