محمود سعد لصاحب واقعة محل الكشري: أبقى قابلني لو حد أفتكرك

محمود سعد

شدوى ممدوح

علق الإعلامي محمود سعد، على الجدل المثار حول صاحب واقعة محل الكشري، لافتاً إلى أن ما يفعله الآن “تريند“.

قال “سعد“ خلال فيديو جديد له عبر صفحته الرسمية على موقع “فيسبوك”: “أنا مش هتكلم عنه لأن محمد مشغول دلوقتي وشوفتله صورة إمبارح أو أول وهو بيلعب تنس، وصورة تانية وهو بيغني مع ابن شعبان عبد الرحيم.. يا ولدي جاتلك فرصة ذهبية أفعل شيئا“.

نرشح لك: محمود سعد: أنا شاهد على عرض أحمد زكي الزواج من رغدة

أضاف: “ناس كتير في الوطن العربي بتسأل عن محمد وقصة الكشري.. طبعا أنت هتطيرها بشوية تريندات كده وخلاص وبعد كده أبقى قابلني يا محمد بعد أسبوعين لو حد أفتكرك، إنما أفعل شيء وأستغل الفرصة دي، الفرصة دي ذهبية أن الناس تعرفك إنما تروح تلبس تيشرت وتروح النادي تلعب تنس، وتغني إيه ده؟.. أنت حر يا محمد ربنا معاك“.

أردف: “في ناس بتبقى دي شغلتها ومثل هذه الظواهر لا بد أن تُبحث، القصة بدأت قصة إنسانية بعد كده راحت زي ما أنت شايف لكن ساعات يأتي من ضجة أو من لا شيء، شيء شوف ربنا قادر على كل شيء.. ممكن كانت تبقى فرصة لمحمد أنه يستغلها في أنه يشتغل حاجة أو يعمل حاجة، ربنا معاه على كل حال“.

كان الإعلامي محمود سعد، قد قال إنه سيتفرغ ثلاثة أيام ليدرس فيها كلمات مغني الراب ويجز، موضحا أن ويجز يمثل مصر لدى الشعوب العربية، كما كانت أم كلثوم وعبد الحليم يمثلون مصر.

أضاف “سعد” خلال مقطع فيديو نشره عبر قناته على “يوتيوب“: “أنا هتفرغ لمدة 3 أيام أقعد أدرس ويجز بيقول إيه؟ لأني لما شوفت الأغنية هي مكتوبة بالعربي بس ملحقتش أقرأها، لكن عايز أبص بيقول إيه، حاجات لطيفة جدا، وعلى فكرة هو بيعمل مجهود، ده موجود في الوطن العربي، بيمثلما يعني، زي ما كانت أم كلثوم وعبد الحليم ونجاة بيمثلونا”.

أشار: “ويجز بيأسس لفن جميل، تعالوا نساعده، نقوله أنت جميل بس محتاج كذا.. ويجز حاجة لطيفة، ومن ساعة ما شوفت حفلته أول أمبارح بدأت أشوف أنه مفيش مانع أن الواحد يكون في مكان ويقوم يرقص على المزيكا دي، ملهاش علاقة بالسن حتى لو عندك 100 سنة، المزيكا اللي بتحرك مشاعرك دي حاجة حلوة جدا”.

أوضح: “ويجز لطيف، ومزيكا مختلفة، يقولولك ده بيلبس لبس مش لبسنا، ما يلبس اللي هو عايزه، الناس بتحبه كده وهو بيغني للناس كده، 52 ألف شخص نزلوا قعدوا في الحفلة يسمعوا ويجز.. لو أنت هتتهم ويجز أنه بيعمل فن مش عاجبك يبقى الملايين اللي بتشوف أغانيه دول مش متربيين بقى”.

أردف: “اللي عمله مصطفى كامل عندي عليه تحفظ، اللي يغني يغني زي ما هو عايز طالما هو لا بيحتك بأمور سياسية خطيرة تمس الأمن القومي لبلدنا، ولا بيحتك بأمور دينية تمس ديانتنا ولا بيحتك بحاجات إباحية، طالما مبيعملش الحاجات دي خلاص يغني ويتبسط والناس تنبسط”.