فريدة سيف النصر عن منتقدي الفنانين: كأن بينا تار

سالي فراج

عبرت الفنانة فريدة سيف النصر، عن غضبها من المنتقدين للفنانين مؤخرا، مؤكدة على أنها لجان مستهدفة الفن المصري، والقوى الناعمة المصرية.

كتبت “سيف النصر” عبر حسابها الشخصي على موقع التواصل الاجتماعي “فيسبوك”، تؤكد على أن الكلمة القاسية تذبح، موضحة: “أنا زعلانه علينا كلنا أوي، المصريين أحلى، وأطيب، وأجدع من كده بكتير، خفة دم وكرم وذوق، إيه اللي حصل، ليه بنستخبي ورا شاشات وننزل نحر رقاب بعض، الكلمة القاسية بتدبح بقينا نكديين مانعرفش نفرق بين جد وهزار كله عايز يتخانق مع كله، إيه ده وكل يوم يعاملوك بوش أو حسب المصلحه، فيه إيه؟”.

نرشح لك: بسبب وسامة بعض الفنانين.. فريدة سيف النصر: كان نفسي أبوسهم

أضافت أن هناك بعض الأشخاص تنتقد الفنانين كأن بينهم تار، مردفة: “بعض الناس ماسكين الفنانين وكأن في تار بلا أسباب دي عجزت ودي كرمشت ودي غيرت دينها وده دمه تقيل وده كبر في السن، وده بيغني وده بيرقص كونغرو وده اتكسح ودي روحي موتي كفايه، مالكم في إيه بجد”.

أشارت إلى أن الفنانين أسعدوا الجمهور يوما ما، ولا يجب هدم القوى الناعمة المصرية بتلك الطريقة، قائلة: “هما الناس دي ما أسعدكمش أعمالهم فترات من الزمن، طيب بلاش إنت مابتحبيش فلان غيرك بيحبه، فيه إيه ياجماعة تحسوا مخطط لهدم الفنانين القوى الناعمة اللي فاتحين بيوت 14 مليون، متخيلين كل المهن شغالة ومعانا تحت أيديهم كام عامل وأسطى كل واحد فيهم عنده أهل وزوجة وأطفال وفي اللي جوز ولاده وعندهم بيوت مفتوحة”.

أردفت: “بتحاربوا تمن عدد البلد في أكل عيشهم، اقرأوا كده المسلسل بيكتب ناس قد إيه عمالة في العمل شوفوا وقولولي، كفاية هد في الفن، الوحش إنقدوه بأدب والكويس شجعوه، إنما تهزءوا فنانين كبار ليه يعني، علي فكرة أنا عارفة إنها لجان مستهدفة الفن المصري، والفن عموما ماهو العربي بيصب هنا، هاه قررتوا إيه هانشتم من ورا الشاشة ولا هنقول كلام نصح حلو ياباشا؟”.