هنادي مهنا: أتمنى أحمد خالد صالح يبقى أنجح مني

قالت الفنانة هنادي مهنا إنه لا توجد غيرة فنية بينها وزوجها الفنان أحمد خالد صالح، موضحة أنهما مختلفان كونهما رجل وامرأة لذلك فحدوث الغيرة هنا غير متوقعة.

أضافت هنادي خلال حوارها مع الإعلامية لميس الحديدي في برنامج كلمة أخيرة عبر قناة ON أن المنافسة غير واردة بينهما، مضيفة: “مظنش إن احنا بنفكر كده خاصة ان احنا راجل وست فالموضوع مختلف جدا.. تاني حاجة أنا أتمنى إنه هو يبقى أنجح بكتير وهتبسط له جدا.. بالعكس أصلا لما بينزله حاجة ببقى فرحانة أكتر منه وأبقى متحمسة جدا ليه كأنه ليا أنا”.

نرشح لك: هنادي مهنا: نفسي أفتح حضانة

وكشفت الفنانة هنادي مهنا، عن سر رشاقتها وخسارتها لوزنها، موضحةً أنها كانت في أسبانيا خلال فترة الجامعة تتحرك بشكل كبير وكانت رشيقة.

تابعت “مهنا” خلال حوارها إلى برنامج “كلمة أخيرة” الذي تقدمه الإعلامية لميس الحديدي على قناة “ON”: “لما جيت مصر كان فيه دلع كتير أوي، محشي وحمام ومسقعة ودي حاجات مينفعش تتساب وماتتكلش”.
واصلت: “كنت بدرس في أسبانيا في مجال هندسة الصوت بمجال الموسيقى لأني كنت بحب المزيكا أوي وكان حلمي إني أغني قبل التمثيل واكتسبت ده من الجينات من والدي، ولما جيت مصر اشتغلت مدرسة ودرست كذا حاجة وكنت فاتحة شركة مع بابا وأنا بحب اشتغل من صغري حتى في الصيف من صغري ومش بحب أقعد في البيت”.

أردفت: “لما اشتغلت ممثلة مكنتش مستوعبة طبيعة الشغلانة وأن الشغل موسمي ممكن يبقى مكثف شهرين متتالين ثم شهرين آخرين قاعدين في البيت مش بنعمل حاجة ودي كانت حاجة بالنسبة لي فيها إحساس غريب وكنت بقول فيه حاجة غلط لأني متعودة على الشغل اليومي وأني أنام وأصحى عشان ورايا شغل”.