محمد الشواف يكتب: التحرير.. خسارة فيكم
- محمد الشواف
مش زعلان على قفل جريدة التحرير .. ومش زعلان أن أعز أصحابي اتشردوا للمرة التانية .. مش زعلان أن احسن صحفيين في مصر بقوا بدون جرنان.. مش أول مرة .. ومش هتكون الأخيرة.
انا زعلان أن مصر بجلالة قدرها مش قادرة تحافظ على كنز زي صحفيين التحرير .. حكومة بقى ولا شعب ولا نقابة ولا رجل أعمال .. محدش بريء من دم جريدة التحرير.. لأن كلهم ساكتين على وأد الصحفيين وقتل موهبتهم.. وكسر اقلامهم.
عاوز تتعاطف معاهم وماله.. مش عيب .. عيط عليهم .. انا نفسي بعيط على حالهم وحال كل صحفي حر صوته من دماغه .. عاوز تساعدهم .. وماله افتحلهم جرنان وارميهم فيه الكام سنة اللي جايين .. بس تضمن انك تبري اقلامهم وتقصرها على قد ما تقدر .. عشان كل ما القلم يقصر الجريدة عمرها بيطول.
عارف انت بتكسر قلم مين .. دول ولاد إبراهيم عيسى .. تربيته .. تتفق أو تختلف معاه .. عيسى هو أستاذ هذا الجيل .. وبلاش مزايدات لأن قلم عيسى انضف من كل المطبلاتية.. ولحاسين الجزم.
مش بدافع عن إبراهيم عيسى .. بدافع عن ناس عملت صحافة بجد .. صحافة انتوا ما تعرفوش معناها ولا قيمتها. صحافة كل كلمة فيها بتوجع ضمير لسه صاحي .. صحافة كل نقطة حبر بتطبع حروفها شايلة وجع الناس دي .. الناس اللي هيصحوا على فيض الكريم بقلم و ورقة لأنهم اكيد هيبيعوا الكومبيوتر عشان ياكلوا ويشربوا بتمنه مش مستنين عطف ولا نظرة شفقة من حد .. الدستور اتباعت و شالوا الورقة والقلم على اكتافهم وراحوا على شغلانة انضف منها .. وأهم هيشيلوا القلم والورق ويستنوا شغلانة تستاهل صنعتهم.
بس عارفين .. التحرير خسارة فيكم .. خسارة في ناس مش عاوزة تستوعب أن البلد بتتغير. . خسارة في شعب بيدور على الجنس اكتر ما بيدور على قوته .. خسارة في مواطن تافه عايش حياته بدون ما يحس باللي بيحصل فيها.. خسارة في حكومة قافلة ودانها ورافضين يسمعوا اللي ينورلهم طريقهم..
التحرير خسارة فيكم .. خسارة أقلام زي الورد تدبل عشان ناس ما بتقدرش.. لو عارفين يعني ايه تحرير ما كنتوش قفلتوها. . لو حاسين بقيمة كل كنز فيها ما كنتوش خسرتوها. .
التحرير خسارة فيكم .. لأنها بجد كتير عليكم.. وكل الناس فيها يقدروا يعملوا 300 تحرير جديدة .. الدنيا مش هتقف على عتبتكم. . وصحفيين التحرير تاج فوق رأس الناس اللي حرروا عقولهم من الجهل وعرفوا أن الناس دي بتعمل صحافة بجد .. أما الباقيين فعلا التحرير خسارة فيكم.
رسالة أخيرة .. منكم اتعلمت وبيكم ربنا سندني في مشواري ولولا كل كلمة اتعلمتها من أصغر واحد فيكم ما كنت ولا كان في دستور ولا تحرير .. وحشتوني.