من غير زعل بقى
أكيد أنا لا بحب ولا باحترم أحمد موسى، بس فكرة إن كل شوية الناس تبقى مبسوطة علشان حد ضرب واحد إحنا مش بنحترمه بالقفا وجري مستغربها جداً، لأن لا إحنا مقامنا نضرب ونجري، ولا القفا بيأثر وبيقلل من قيمة حد – في حالة إنه له قيمة أصلا – هو مجرد غضب بيطلع، وغضبنا في رأيي لازم نوجهه في الطريق الصح، الناس دي عملت جرائم لازم تتحاكم عليها، والمفروض يبقى الجهد اللي بنبذله إننا نقف ونواجه علشان نبني وطن عادل الناس دي تتحاكم فيه، مش نضرب ونجري.
عارف إننا نشوف اللي بيقلوا أدبهم علينا ليل نهار بيتهانوا دة بينفس شوية من غضبنا، بس انا مش مع التنفيس عن الغضب، أنا مع الحفاظ عليه وتوجيهه لتحقيق اللي بنحلم بيه.
إحنا مش زيهم، وماتخلوش الغضب يخلينا نعمل أفعال تخلي المقامات تتساوى، ونبقى كلنا بنعمل حركات صغيرة زي بعض، لأننا عاوزين ننتصر بطريقتنا.
(نقلا عن الحساب الرسمي لـ زياد العليمي)
