محمد نجاتي لـ منة عرفة: "مش عايزة حد يلمسك متمثليش"

علق الفنان محمد نجاتي، علىى الشائئعات التي لاحقته خلال الساعات الماضية، بأنه سبب طلاق منة عرفة وزوجها.

قال “نجاتي” لـ “ET بالعربي”، إنه يشارك منة عرفة في مسلسل باسم “فيلا 101″، يصور حاليا، وتجسد فيه منة دور شقيقته.

نرشح لك: زوج منة عرفة: أرفض تمثيلها لمشاهد قبلات وأحضان

أشار إلى أن المشهد الذي تسبب في الأزمة كان إغماء منة عرفة، إذ أنه يلعب دور طبيب نسا، وكان عليه أن يكتشف حمل شقيقته من وراء العائلة حتى تتصاعد الأحداث الدرامية.

لفت إلى أنه كان من المفترض أن يغمى على منة ويحملها ثم يكشف عليها ليكتشف الحمل، متابعا: “رفضت منه أنها تتشال، قولتلها أنا معنديش مشكلة إحنا في النهاية بنمثل مشهد مطلوب مننا، وأنتي أصلا أختي في الحقيقة وطالعة بدور أختي، فطبيعى جدا أنا اللي اشيلك.. المهم حصلت مشكلة وقولتلهم خلاص متعملوش المشهد ده أو اعملوه من غيري”.

أضاف: “المشهد اللي بعديه.. المفترض إني بكشف عليها بعد كده بكتشف أنها حامل، هكشف عليها ازاي من غير ما أجس النبض! فقولتلها أنا هجس نبض إيدك، قالت لا مش هينفع بردو، فهنا أنا عملت مشكلة، ما هو مش معقول بقى”.

تابع: “طالما أنتي مش عايزة حد يلمسك، خلاص متنزليش من البيت بقى أصلا ومتمثليش.. فصممت إن أنا أعمل دوري كما يجب وعملت النبض ده وقيست حرارتها، أنا كده معملتش حاجة غلط.. أفاجئ تاني يوم كل الناس بتقولي المشهد ده كان سبب في انفصالهم!”.

على صعيد آخر، كانت منة عرفة، قد كتبت عبر خاصية القصص القصيرة على حسابها الشخصى على “إنستجرام”: “من أصعب اللحظات اللي ممكن تعدي على أي ست لحظة الانفصال وخراب البيوت الطلاق يهتز له عرش الرحمن لكن انتوا يمكن عشان بتسمعوا عن بيوت بتتخرب كل دقيقة، فابقى أبغض الحلال عند الله بالنسبة ليكم نكتة أو حاجة تتمسخروا عليها، رهان بتعملوه مع بعض على إننا مش هنكمل، أو مادة خام للشماته فينا، خراب البيوت عمره ما كان حاجة سهلة على الست أو على الراجل أو على أهالينا، في عز ضعفي وحزني وكسرتي اللي ربنا ما يكتبها على أي ست مرحمتنونيش، ولا قدرتوا إني في موقف لا أحسد عليه وشمتانين فينا.. قد ايه انتوا ناس متعرفوش ربنا ولا في قلوبكم رحمة”.

تابعت: “اتمنوا الخير لبعض يا جماعة بلاش نشمت في بعض، لكن دي غلطتي أنا إنى شاركتكوا حياتي الشخصية، الإنسان بيغلط عشان يتعلم وأنا اتعلمت وربنا يعينكم على نفسيتكم الجحيم دي، وعسى أن تكرهوا شيئا وهو خير لكم، يمكن الخلاف اللي حصل كشف لنا ناس كتير حوالينا كانوا بيمثلوا انهم فرحانين لينا بس الحقيقي أنهم كانوا مستنين أول مشكلة علشان يسمعوا في كسرنا وخراب بيتي، بس والله ربنا مش هينولهلكوا وربنا يخليلي أهلي وزوجي والناس اللي بتتمنالي الخير وواقفت جمبي، وكلمة أخيرة للسادة الصحفيين أرجوكوا كفاية بقى”.