أبرز تصريحات محمود سعد في أولى حلقات "باب الخلق" على يوتيوب
تحدث الإعلامي محمود سعد عن ذكريات التحضير لبرنامج “باب الخلق” قبل بداية عرضه على قناة النهار، كما تحدث عن مواعيد عرض البرنامج ومحتواه في شكله الجديد بعد إيقاف عرضه على “النهار” وبداية عرضه على قناته عبر يوتيوب.
نرصد أبرز تصريحات محمود سعد في أولى حلقات “باب الخلق” على قناته الرسمية عبر يوتيوب، في السطور التالية:
نرشح لك: محمود سعد يكشف كواليس جلسة وقف برنامج “باب الخلق”
1- كنت أقول لأصحابي التليفزيون ده بكرة هيخلص وهيبقى عندي مشكلة، فهجمعكم كده غصب عنكم تقعدوا وألبس البدلة واحكيلكم شوية حكايات وأقولكم أخبار الدنيا، وكانوا يتريقوا عليا، لكن شاءت الدنيا إن البرنامج يوقف ونلاقي وسيلة تانية نتقابل بيها.
2- متعود لما بعمل برنامج جديد، يعني يكون البرنامج أو موسم بيبدأ، أحب جدا إذا لم تتوفر بدلة جديدة، تبقى كرافتة جديدة، والقميص يعملهولي عم وليام جديد، يفصلهولي، وأنا بهتم جدا بالجزمة، لو تبقى جديدة يبقى كويس جدا، هتقولي الجزمة مابتبانش، لا، دي مسائل نفسية.
3- يعني مثلا أفرض إني أخدت شراب وبعدين وأنا داخل اصور حسيت إن الشراب مش لايق، معرفش اشتغل، ومحدش بيشوفه، لا، لازم أحس إني على سنجة عشرة، لأن الواحد بيبقى على سنجة عشرة لما يكون عنده معاد مهم، وأنا معنديش حاجة أهم من الشغل، الشغل بالنسبة لي معاد مهم جدا، أهم معاد.
4- روى أنه أثناء التحضير للبرنامج قبل بدايتها على قناة “النهار” سمع الفنان علي الحجار اسم البرنامج “باب الخلق”، مضيفا أن “الحجار” أخبره أنه لديه أغنية اسمها “خلق الله” ويريد أن يهديها للبرنامج، مشيرا إلى أنه عندما سمع الأغنية أعجبته جدا.
5- حسيت إني جيت 60٪ أو 70٪ من البرنامج داخلة فيه منتهى الجمال، هي بالظبط، أثارت شجوني أنا شخصيا، فروحت لزمايلي قولتلهم إيه رأيكم في الأغنية، الباقيين وشهم أصفر وقالولي علي صوته حلو بس الأغنية حزينة كئيبة، فقولتلهم لا دي تثير الشجون مش هتخلي الواحد يعيط، قالولي لا، أول ما قالولي لا، قولت هي دي، وزي ما أنتوا شايفين صدى الأغنية بقى جميل جدا جدا.
6- وطالب الجمهور بمشاركته ببعض الاقتراحات لموضوعات البرنامج، كما أعلن محمود سعد عن مواعيد عرض “باب الخلق” عبر قناته على يوتيوب، وهي الجمعة والسبت، الساعة 9 مساء، كما سيتم تحديد يوم لبث مباشر إضافة للحلقتين الأساسيتين لتبادل الآراء.
