ريم البارودي: نفسي أشتغل مع منى زكي
نورهان عبد الرحمن
كشفت الفنانة ريم البارودي، أنها تتمنى العمل مع الفنانة منى زكي، وعن استعدادها لعمل فني قريب “العلمين”.
قالت “البارودي”خلال حلقة مساء الجمعة ببرنامج “أون سيت” المذاع على شاشة “ON” مع الإعلامية شيرين حمدي: “العمل الناجح بيفرض نفسه يعني السنة دي في عمل ناجح جداً جداً مقالش خالص إحنا تريند، المسلسل ده ناجح في الوطن العربي (لعبة نيوتن) لمنى زكي، هما الناس الوحيدة اللي مقالوش إحنا تريند، أو كل الأساتذة اللي فيه الفنانين محدش طلع وقال إحنا تريند إنت مش محتاج ده لأن إنت أحسن واحد فعلاً”.
وأضافت: “الجمهور هو اللي بيحدد في الآخر هو الجمهور وفيه جمهور كتير أوي مش على السوشيال ميديا”.
وعن رأيها في الفنانة منى زكي قالت: “منى زكي بحبها حب بحبها جداً ومفيش حد مبيحبهاش وموهوبة أوي ولعبة نيوتن حببني في الفن أكتر”، موضحة “يعني عارفة لما تقولي لسة في أمل ولسة الدنيا بخير في الوقت اللي بقولك العبث اللي بيحصل فى السوشيال ميديا وكل شوية أنا تريند ومرة واحد تلاقي الله ده الله لكل الناس حقيقي”.
وعن استعدادها لتقديم عمل فني قريب قالت: “أنا دلوقتي طبعاً فى أجازة وبعد رمضان والعيد كنت محتاجة أخد أجازة عائلية شوية وعندي فيلم لسه “العلمين” إن شاء الله بس لسه الورق بيتظبط وأنا بحب خالد سليم أوي وهو من أحلى المطربين وكمان دمه خفيف جداً جداً وأول مرة أشتغل معاه مطرب وممثل وخلوق أنا بحبه جداً ودايماً لما بنتقابل نقعد نضحك وهو البطل وأنا هكون معاه”.
يذكر أن ريم البارودى شاركت في دراما رمضان الماضى بمسلسل “كله بالحب” بطولة زينة، أحمد السعدني، صابرين، سامر المصرى، ريم البارودى، هالة فاخر، مصطفى درويش، محسن منصور، نور قدرى، يسرا مسعودى، والمسلسل من تأليف ورشة أحمد الشخيبى، وإخراج عصام عبد الحميد.
كما شاركت ريم كضيفة شرف فى مسلسل “فارس بلا جواز” تأليف فداء الشندويلى وإخراج معتز حسام، بطولة مصطفى قمر، محمد ثروت وطارق عبد العزيز وسليمان عيد وطارق الإبيارى ومحمد طعيمة، وعدد من الممثلين الشباب منهم مصطفى حمزة ومحمد ويوسف وراندا عبد السلام ومغاورى.