عمرو أديب يطالب بإصدار قوانين ضد الاغتصاب الزوجي

دنيا شمعة

علق الإعلامي عمرو أديب على التطور الذي حدث منذ فترة في المجتمع المصري من حيث تطبيق قوانين التحرش والاغتصاب.

قال “أديب” خلال حلقة أمس الجمعة من برنامجه “الحكاية” عبر شاشة “mbc مصر”: “إحنا بقالنا مدة في موضوع التحرش ده زي سويسرا، مبقاش فيه الجمل الحمضانة بتاع زمان بتاع أصلها كانت لابسة إزاي ولا أصلها خرجت متأخر.. لأ دلوقت المتحرش بيتجاب من قفاه، إحنا جبنا واحد من البرازيل وروح بلده قعد يعيط إنه غلط في واحدة مصرية.. تحية للمجتمع المصري الذي ارتقى فيما يخص التحرش”.

نرشح لك:طليقة الفنان “ت.ي” تعلن تعرضها للاغتصاب الزوجي

أضاف مطالبا مجلس النواب والمشرعين والمجلس القومي للمرأة ورجال الدين: “أرجوكم تعاطفوا معانا في هذا الأمر، لأن فيه شيوخ بردو من إياهم لسة مصرين إن ده حق الرجل وإنها لا يمكنها التمنع عنه.. ده كلام؟ أنا مكنتش متخيل إن هيجي اليوم في مصر اللي ألاقي زوجة بتتكلم إن زوجها اغتصبها، أنا مش هحط الفيديو ولا هقول أسماء لكن إحنا لازم نفكر كيف يمكن ضبط هذا الأمر”.

أردف: “هتقولي وايه أهميتها هقولك أهميتها إننا لازم يبقى عندنا إنسان سوي، ما هذه المرأة بتصحى تاني يوم كارهة الدنيا وده بيأثر على المجتمع كله لأنها إنسانة مجروحة”.

استطرد مشيدا بتطور وزيادة الوعي ضد التحرش: “وصلنا لمرحلة إنه اللي بيصور أي حاجة بتنتشر وكله بيتحاسب، وفورا النيابة والقضاء بيتحركوا والمجتمع كله بينتفض”.