عبد الله غلوش يكتب: غلوشيات رمضانية (13)
– المتحدث العسكري .. ربنا يكون في عونك بس ادائك البطئ هو السبب الرئيسي اللي خلي الكل يفتي ويقول احداث و ارقام من دماغه .
– نفسي قناة واحدة تاخد قرار الحداد من نفسها وماتنتظرش لما يجيلها التعليمات.
– Cbc اكسترا و on tv والنهار اليوم.. طالما انتم مش عارفين تغطوا اي حدث خارج حدود القاهرة ، يبقي ايه القيمة من استمراركم.
– قطاع الأخبار في التليفزيون المصري .. ليس علي المريض حرج.
– سكاي نيوز عربية .. الأفضل والأسرع في تغطية احداث سيناء.
– قناة العربية منذ عاصفة الحزم .. في تراجع مستمر.
– مشاهدة الجزيرة في نهار رمضان يفسد الصوم.
– راديو مصر.. الإعلان في موجز ونشرات الأخبار عن رقم حساب للتبرع لصالح حفل افتتاح قناة السويس ، فكرة رائعة بس الأروع لما تختار لها الوقت المناسب.
– بعد كل اللي بيحصل ده ، ووسط كمية المسلسلات اللي عاملينها السنة دي ، القناة اللي هاتعرض مسلسلات تركي تاني بعد رمضان يبقي معندهاش دم.
– لو التفتيش عند معبر رفح زي الموجود عندنا كده في مدينة الانتاج وهايبر أو مول العرب ، يبقي أكيد كل الاسلحة اللي جنودنا ماتوا بيها عدت من هناك..
– غالبا مبصدقش كل البوستات اللي هيئة (استغاثات – اخبار – صور ) علي اساس انها من ناس متواجدين في سيناء .. ما هو مش طبيعي النت عندنا زي الزفت وهناك في الاماكن اللي المفروض الاتصالات فيها مقطوعة ، النت يبقي زي الفل والناس قاعدة عليه عادي.
– احتراما للحدث ولشهدائنا مش هاعلق علي موقف قيادات الدولة من اللي بيحصل ، بس بكل صراحة النهارده اكتشفت ان واحد زي اللواء احمد وصفي ده اتظلم.
– بعيدا عن الأحداث ، ممكن افهم ان الدكتور مبروك عطية يطلع كل يوم علي شاشة دريم وعلي يمينه بوكيه ورد احمر يقعد يقطع فيه طول الحلقة ، لكن اللي مش قادر افهمه بصراحة حزمتين النعناع اللي كانوا علي شماله في حلقة النهارده.
– يارب انتقم من الاخوان واعوانهم وكل من ساهم في وصولهم للحكم يوم من الأيام.
– يارب صبر قلب امهات واهالي الضباط والجنود اللي استشهدوا .
– يارب انصر جيش مصر .. يارب انصر جيش مصر .. يارب انصر جيش مصر.
– ربنا يرحمك يا أمي ويرحم أمهاتنا جميعا ويخلي امهاتكم يارب.
اقـرأ أيضـاً:
عبد الله غلوش يكتب: غلوشيات رمضانية (12)
عبد الله غلوش يكتب: غلوشيات رمضانية (11)
عبد الله غلوش يكتب: غلوشيات رمضانية (10)
عبد الله غلوش يكتب: غلوشيات رمضانية (9)
عبد الله غلوش يكتب: غلوشيات رمضانية (8)
عبد الله غلوش يكتب: غلوشيات رمضانية (7)
.