هبة العفيفي: كذب الممثلون ولو صدفوا
الناس مبقاش يخيل عليهم كلام السيما ولا حكاوى المسلسلات ..لانك لو قعدت نص ساعه في اى كافيه وسمعت الناس وهى بتتكلم وبتنقد الحوار والملابس والديكور هتفهم ان الناس اوعى من اى ناقد فنى بيلف العالم في الندوات
مش منطقى ان كل الممثلين طالعين طول الوقت بالمكياج الكامل مش منطقى انها تصحى من النوم مش منكوشه والروج مش سايح والحكل مش نايح
مش منطقى الديكورات المبهرجه في كل المسلسلات زى ما هو مش منطقى كميه الشرب والرقص والخمور
اه حياتنا مش زى زمان اه نسبه الفساد الاخلاقى اكبر بكتير من زمان بس مش اه اننا كلنا مابنسيبش الكاس والسيجاره
لا احنا ماشيين بالكعب اليوم كله ولا احنا بنعيط اليوم كله ولا احنا بنحب اليوم كله
ضحك عليكوا اللى قال ان المسلسلات بتنقل الواقع اه يمكن جزء من الواقع بس مش الواقع بتاعنا
مهو مش منطقى بردوا الحكايات كلها يا قصور يا عشوائيات
استحواز كل كاتب نجح مع ممثل في مسلسل خلا الناس تتوقع نتائج المسلسلات كلها
مش معنى ان قصص الجرائم والالغاز اللى مش مفهومه تنجح يبقى السنه اللى بعدها نعقد اكتر الالغاز
مش معنى ان الشحتفه والعياط نجح يبقى كله مأسى وعياط وشحتفه
مش منطقى ومش من حياتنا ان الممثل كل مشهد بلبس مايلبسوش تانى
حاجات صغيره بتفرق كتير بين الواقع الحقيقي وتقليد الواقع
حاجات صغيره بتفرق بين اننا نصدق التمثيل او يدخل علينا
احترام عقل وواقع وحقيقه المشاهد هو اللى بينجح اى عمل درامى مش الحبكه والذروه والحدث
ليه عمرنا ما شوفنا ممثله من غير مكياج خالص
ليه عمرنا ما شوفنا ممثل بيتف
ليه عمرنا ماشوفنا ست في منطقه شعبيه او في البيت الجلابيه بتلزق في جسمها من القاعده
واقعيه الدراما مش بالقوة ولا بالبلطجه ولا بالبارات ولا بالرقاصات ولا بالقصور والفلل زى ما هى مش بالشتيمه بردوا
التمثيل مش كله مكياج وبواريك ورجاله حلوه ومستحميه طول الوقت
افهموا بقى ان اغلب الواقع مش كده وحتى القرب من الواقع الحقيقي بيبقى صدفه
انزلوا اسمعوا راى الناس اللى بتتفرج اسمعوا تحليلاتهم هتفهموا انه كذب الممثلين والمؤلفين ولو صدفوا …