عمرو حسن ردًا على هجوم "العسيلي": "أنا المقصود!"

هبة الله حسين

نشر الشاعر الشاب عمرو حسن عبر حسابه الرسمي على موقع التواصل الاجتماعي “فيس بوك” منشورًا يوضح فيه ما تعرض له من هجوم من قبل الفنان محمود العسيلي.

قال “حسن”  خلال المنشور: “الفنان محمود العسيلي، تعالى علشان عاوزك في كلمة على جنب، بص يا سيدي، ربنا بيغضب على حد بيسلط عليه نفسه، يقوم يعمل ايه، يجيب الحاجة اللي ربنا ادهاله ويدوس عليها وتهيأ له نفسه أو المحيطين به أنه فذ الأفذاذ حتى ولو كان بيغني غلط وبيقول أتوان ما سمعناش عنها ولا هنسمع”.

نرشح لك – رسالة رامي صبري لـ”العريان” في عيد ميلاده

وأضاف الشاعر الشاب: “مرة وصاني ملحن لا داعي لذكر اسمه، اني ابعتلك حاجه او اتنين وقاللي حرفياً عندك اكتر من حاجه شبهه ابعتله وهتشوف رد الفعل قد ايه هينبسط، بعتلك وما قولتلكش أنا فلان ولا علان وقولتلك لو تحب تغني الحالة دي هنبسط لأنها لونك، وسكت خالص بعدها، وانت ماردتش وانتهى الموضوع”.

وتابع: “المشكله مش فيا، أنا سلكت طريقي ومش هيفرق معايا اعملك او اعمل لغيرك لأني مش فاضي ولا شغلي يخليني اركز ف ده، المشكلة ف الولاد الشباب، اللي بيحلموا، الكاتب والملحن اللي ماغلطش في حاجه غير أنه حاول يبعتلك غنوة أو لحن يمكن تحبه وتبقى خطوة ليه عشان بكره، اللي لو كان معاك في المدرسة أو متربي معاك يبقى شرف ليك لأن الشخص اللي بيسعي بالحلال وبيحلم ف الزمن ده شرف لواحد زيك او زي غيرك انه يشتغل معاه لو حب شغله ، ولو محبش شغله يسكت وخلاص وأهو يكسب ثواب الكلمة الطيبة في سكوته، الناس اللي بتقولك أنهم عندهم أشياء شبهك دول نعمة من ربنا مش هتطولها تاني لو حفيت، ولو محدش قال لك أن الأيام دوارة اديني بقولك”.

واستكمل: “وابقى شوف أعظم مطربين السبعينات كانوا فين ف التمانينات وأنجح مطربين التسعينات بقوا فين دلوقتي، أنت مطرب ف الصف التالت او انصافاً ممكن التاني عشان مكونش باجي عليك، ف لو الشباب مابعتوش لواحد زي حضرتك أمال يبعتوا لمين! حماقي مثلاً وشيرين !! حضرتك علي مقاس احلامهم دلوقتي”.

وأشار: “واهو النهاردة أنت تاخد منهم غنوة مين عارف بكره ممكن يكتبوا لرامي صبري ولا تامر عاشور ولا حد من اللي بيتسمعوا كويس مين عارف، عموماً وعشان الخصلك الحوار ده ، أنت غلطت لما لبستهم العمة وقولتلهم أنا مختلف وشاب وبحلم وبدأت من الصفر والكلام ده وانت جليس القعدات اللي بتستنى تطلع منها برقم حد عشان تعمل إعلان، وهما غلطوا لما بعتولك بس اديهم اتعلموا وأنا اعتبرني اول واحد فيهم”.

واختتم: “لو التويتة دي عني أنا مسامح أنا الغلطان لأن فيه حد قاللي اكتبلك حاجه عشان انت مابتدفعش كويس وده دوري تجاه جيلي والهري ده وانك بتجتهد وبتاع أما بالنسبة لأي كاتب أو ملحن من الزملاء، عاوز أقولك ف طريقك للنجاح هتلاقي ناس هيوقفوك هيحاولوا ييأسوك ويكسروك ويحبطوك، خليك دايماً جامد، وفكك منهم عشان دول اخرهم يرددوا كلام زي البغبغنات عشان ياخدوا فلوس إعلانات يغيروا بيها عربية او يجيبوا هدية لصاحبتهم ف عيد ميلادها، سلام يا برنس”.

يُذكر أن تعرض الفنان محمود العسيلي إلى هجوم قاسي عبر حسابه الرسمي على موقع التغريدات “تويتر” بعد نشره تغريدة تحمل في معناها هجوم شرس على الشعراء الجدد، وتذمره للرسائل المجهولة التي تُرسل له..

الإخوة اللي عايزين يبقوا ملحنين أو شعراء اللي بيبعتوا على الواتس الآب الخاص و يكلمك فجأة على انه متربي معاك و إنكو كنتوا مع بعض في المدرسة و يبعتلك إسهال من الأغاني و سبحان الله كلهم الجو بتاعك و لايقيين عليك و باعتهملك مخصوص .. بلوك مع جزيل الشكر #اسمع_الخيال_دا_يانجم

— Mahmoud El Esseily (@Esseily) September 12, 2018