أحمد شبكة يكتب: ع الأصل دوَّر (7).. والليلة عيد
إذا كنت فاكر إن أغنية “الليلة عيد” دي أغنية اتكتبت واتلحنت بمناسبة الأعياد فراجع نفسك وعيد حساباتك، لأنها لا تمت للأعياد بصلة ولكنها أغنية غزل في الحبيب صاغها شعرًا مولانا بيرم التونسي رضي الله عنه، وصاغها لحنا شيخنا وسيدنا زكريا أحمد عام ١٩٤٣، ولو مش مصدق فالأغنية اسمها “حبيبي يسعد أوقاته” وتقول كلماتها:
حبيبي يسعد أوقاته
ع الجمال سلطان
ف نظرته وابتساماته
فرحتك يا زمان
ويستمر الغزل حتى آخر الاغنية لما تقول: والليلة عيد ع الدنيا سعيد عز وتمجيد لك يا حبيبي…
نرشح لك: أحمد شبكة يكتب: ع الأصل دور (6).. دوم ددوم دوم دوم
ومن الطريف إنك تعرف إن كوكب الشرق السيدة أم كلثوم نالت وسام من جلالة الملك فاروق بسبب الغنوة دي، لإن اللي حصل إن كوكب الشرق كانت بتغني في الأزبكية وتفاجأ الجميع بدخول الملك وبعد أن اتخذ مجلسه وتفضل وسمح باستكمال الغناء غيّرت الست كلام الغنوة ع الهواء، وهي على المسرح وقالت: والليلة عيد ع الدنيا سعيد عز وتمجيد لك يا مليكي.
وكان نتيجة الحركة الذكية جدا دي وسام ممنوح من جلالة الملك تاني يوم الحفلة للسيدة أم كلثوم نقيبة الموسيقيين.
صدقت؟ على العموم ما تزعلش لان ناس كتير كانت فاكراها أغنية للعيد زي ما ناس كتير لسه بتعتقد إن ” القلب يعشق كل جميل” هي أغنية غزل في المحبوب، رغم إنها أغنية تتحدث عن زيارة الأراضي المقدسة في رحلة حج أو عمرة.
ما علينا..
الأصل اللي بنتكلم عليه في آخر حلقاتنا هو أغنية “يا ليلة العيد انستينا” اللي هي فعلا بتتكلم عن قدوم العيد والفرحة بيه والأغنية دي اتعملت مخصوص لفيلم “دنانير” بطولة السيدة أم كلثوم من كلمات شاعر الشباب زي ما كان بيطلق عليه “أحمد رامي” ومن ألحان مولانا رياض السنباطي، وتم تسجيلها عام ١٩٣٩ واتعرض الفيلم السنة اللي بعده ١٩٤٠، ومن ساعتها وكوكب الشرق بتقولها مع قدوم كل عيد وأصبحت زيها زي رمضان جانا كده ماينفعش ييجي العيد إلا لو أذاعوا “يا ليلة العيد انستينا”.
فضلت الأغنية دي على عرش أغاني العيد إلى أن ظهرت لنا الاستاذة صفاء أبو السعود مع الأستاذ سعد نبيهة عام ١٩٨٩ من كلمات الشاعر الكبير عبد الوهاب محمد وألحان الموسيقار جمال سلامة بأغنية “اهلا بالعيد”، اللي أصبحت أيقونة أخرى لقدوم عيد الفطر أو عيد الأضحى أو أي عيد مصري فيه فرحة سعدنا بيها بيخليها ذكري جميلة لبعد العيد.
وحتى نلتقي في سلسلة مقالات جديدة في موقعنا العزيز إعلام دوت أورج أتمنى لكم صومًا مقبولا وذنبًا مغفورًا وعيدًا سعيدا بإذن الله.