مارينا المصري تكتب: دراما كوين (24)

كل سنة وانتم طيبين، رمضان كريم، وفي “دراما كوين” هجيبلكم كل يوم أبرز المقولات اللي سمعت في ودني، من كل مسلسل، واللي شايفة إن بعضها هيعيش معانا سنين قدام، وتعليقي عليها، وحقيقي تسلم إيد السيناريست.

نرشح لك :  مارينا المصري تكتب: دراما كوين (23)

أبو عمر المصري

–   “كل ما الواحد بيكبر بيعذر الناس”.

علشان بيكون شاف اللي شافوه أو روحه كبرت هي وقلبه ونضج، أصل الغفران نضج، أو يمكن علشان مبقاش في حيل للزعل، أو للفرهدة.

–  “طَلعت قلبي شافت عيوبه ومميزاته ونضفته ورجعته مكانه”.

الناس اللي تشوف حلاوة قلبك وهو عليه تراب وتعب وحزن وتنضفه وتحبه وترجعلك روحك، الناس دي أمسك فيها الناس دي قليلة وبتحب بجد

–  “أنا عايز أعيش جوا الحيط”.

قمة اليأس والخوف والجبن والموت إنك توصل إنك أصغر من حتى إنك تمشي جنب الحيط، يارب تكون مجرد استراحة

–  “زمان وأنا صغير كنت فاكر إن اللي عايز ياخد حقه بياخده بالعدل والقانون بس لما كبرت عرفت إن اللي عايز ياخد حقه لازم ياخده بالقوة”.

أخدان الحق حرفة، والحرفة قانون والقانون لا يحمي الأغبياء اللي بياخدوا حقهم بالقوة، لو اعتبرنا إنهم كدة بيخدوه

بالحجم العائلي

–  “لما امشي وأموت ولا هكون زعلان ولا فرحان، هكون ولا حاجة، هكون مشيت”.

لا ثواني كده، اللي بيمشوا بيفرحوا معانا وبيزعلوا معانا اللي بيمشي بيفضلوا بيسمعونا وبيفضلوا معانا الموضوع كله رحيل جسد

–  “لو هما سابوك مينفعش أنت تسيبهم”.

الناس اللي بيمسكوا فيك وأنت بتتنازل عنهم  دول أمسك فيهم لما تفوق، دول مفيش منهم في مصر غير ٣ مثلا

–  “ليه محسساني إن الـfollowers دول زي ماكون خلفتهم ونسيتهم”.

ساعات بنحب اللي بيحبونا من بعيد وبنحسهم مهمين وقريبين عن اللي قريبين مننا فعلا، يمكن علشان عارفين إن القريبين أبعد ولا يمكن لأن عيوبنا بتبان في الناس اللي قريبين أكتر، في كل الأحوال الـfollowers بالنسبالي حياتي

–  “في نوعين من الهروب هروب إيجابي وهروب سلبي”

كلنا هربنا أو هربانين أو هنهرب، المهم ليه ولإمتى وإحنا أنهي نوع الإيجابي ولا السلبي

–  “اللي جي كله لازم يكون بصراحة ومنغير طبطبة علشان يبقى أحسن”.

ساعات لما تاخد على نافوخك من اللي بيحبوك بتفوق

كلبش ٢

–  “مفيش حاجة مؤكدة في الزمن ده”.

الأكيد ربنا بس

–  “نفسك لو لم تشغلها بالحق شغلتك بالباطل”.

هو اه بس بلاش أنت يا مصطفى (عمرو وهبة في كلبش موهبة صاعدة وأنجح الوجوه الجديدة رمضان ده)

–  “كل ما تقول لست تعالي عايزك في مصيبة تزقطت زي العيال الصغيرين”.

بنحب المصايب أوي والله مش هزار

– الدنيا دوارة

اه والله

أيوب

–  “الدنيا دوارة”

والله العظيم عرفت 

ليالي أوجيني

–  “أنا كنت راضية بحياتي وساكتة”.

الرضا من غير تطلعات ضحك على نفسك، والرضا على العيشة المرة كدبة أكبر

–  “الدنيا طلعت متستهلش نخاف منها ولا نعملها حساب”.

مفيش حاجة تستاهل علشان كل حاجة بتخلص، حلوة أو وحشة

–  “خايف إني معرفش أعيش من غير الخوف اللي اتعودت عليه”.

أنا حاسة إن الخوف بقى ضلي اللي مش راضي يفارقني، شبح أنا بس اللي أقدر أخرج لعنته من حياتي ولو حصل أكيد دنيتي هتبقى أحسن

–  “الحرية مش إنك تتحرر من الناس أو المسؤوليات، الحرية الأهم إنك تتحرر من تفكيرك أنت اللي ممكن يكون هو اللي ربطك”.

مش محتاجة تعليق، حقيقة معروفة بس تنفذها صعب

–  “عمرها ما كانت بالدبل”.

ولا بالجواز

–  “صح، هي بالحب”.

الحب الرابط الوحيد الحقيقي بين أي اتنين، الحب وفقط الحب

طايع

–  “دخلت بيت عدوك ليه؟! قلت علشان حبيبي فيه”.

واللي بيحب حد يبلعله الزلط