مارينا المصري تكتب: دراما كوين (23)

كل سنة وانتم طيبين، رمضان كريم، وفي “دراما كوين” هجيبلكم كل يوم أبرز المقولات اللي سمعت في ودني، من كل مسلسل، واللي شايفة إن بعضها هيعيش معانا سنين قدام، وتعليقي عليها، وحقيقي تسلم إيد السيناريست.

نرشح لك: مارينا المصري تكتب: دراما كوين (22)

1- بالحجم العائلي

-“اللي عايزنا يستنانا”.

والوقت هنا يُبين مين قريب ومين كنّا مجرد تسلية بالنسباله، اللي ينسى مع الوقت مكنش بيحبنا من الاساس

-“من قواعد الاستمتاع باللحظة الحلوة انك متفكرش في اللحظة الحلوة اللي بعدها اللي بعدها…. استمتعي”.
اه لو نبطل تفكير وننبسط، ونبطل stories وننبسط برضه

-“في انك لازم تحترمي اللي بعمله علشانك حتى لو ليا من وراكي هدف”.

طب ينفع كدة، طب يرضيكوا كدة !! ده بجد لأ لأ يعني اللي هو علشاني ازاي طيب، في فرق بين win win situation وبين الاستغلال المتبادل، فرق كبير والله

2- كلبش ٢

-“اللي بيطلع في الروح ده هو اللي يتخاف منه”

اللي بيفرفر بيلطش جامد ومستبيع… خاف من ضربته الاخيرة

3- ابو عمر المصري

-“إنها غابة كبيرة فيها ديناصورات وفيها نمل وانا راضي بالشق اللي عايش جواه”.

مبدئيا كدة مش مصدقة ان فخر استسلم، مع ان ساعات الاستسلام بيكون حل ذكي، بس استسلام عن استسلام يفرق، في استسلام علشان ادراكك ان سلامك الداخلي اهم من اي شيء وفِي استسلام قوة لما تدرك ضغر منافسك وتضيع وقتك معاه وفِي استسلام يأس واحباط وفشل وفِي استسلام هدنة علشان ترجع تضرب الضربة الاخيرة.

4- ليالي اوجيني

-“الموت بيحكم عليكي انك تكبري فجاة”.

جدا، تحس ان قلبك عجز!

-“مفيش حد يعرفنا هنا علشان يمسك لنا كشف اللي يصح وميصحش”.

ممكن حد يقطع الكشف ده، من أيد اللي يعرفنا واللي ميعرفناش

5- طايع

-“يمكن انت مبتلاقيش الحاجة، الحاجة هي اللي بتلاقيك”.

الحاجات اللي بتيجيلك لغاية عندك اوعى تسيبها، القرص بتيجي قليل جدا إلا لو معاك واسطة طبعا

-“تصدق بالله لو زاهي حواس عرفك هيعملك تمثال”.

عن طايع الدلال

-“الاتفاق فعل مش كلام”.

أسمعك احبك اشوفك بتعمل اي حاجة من اللي بتقولها مفيش