عبد الله غلوش يكتب: غلوشيات رمضانية (20)
– شكرا لكل واحد اشتغل في رمضان .. لكل واحد حاول يغير من نفسه .. لكل واحد حاول يعمل حاجة جديدة ومختلفة .. شكرا لكل القنوات وشكرا لكل واحد شارك في برنامج أو مسلسل او إعلان .. الكل تعب والكل اجتهد بطريقته وعلى قدر تفكيره ومجهوده وامكانياته .. يارب اللي عمل حاجة حلوة يكررها ويعمل احسن منها رمضان الجاي ويارب اللي عمل حاجة مكنش موفق فيها يستفيد من غلطاته ويصلحها السنين الجاية ان شاء الله.
أسف لكل واحد كتبت كلمة في حقه أو حق العمل اللي مشارك فيه وضايقته من أول رمضان ولغاية النهاردة ، وأخص بالذكر محمد رمضان – درة – عمرو يوسف – محمد محمود عبد العزيز – درة – عمر حسن يوسف – حمادة هلال – مها أحمد – السيناريست محمد رفعت – درة – هاني سلامة – أحمد كرارة – ميرفت أمين – المخرج رؤوف عبدالعزيز- المخرج ياسر سامي – المخرج زياد الوشاحي– درة – المخرجة هالة خليل – ميريهان حسين – محمد لطفي – بسمة وهبة – إيهاب فهمي – درة – هدى مجد – باسل الزارو – نسرين أمين – دكتور أشرف زكي- درة .. كلكم نجوم واساتذة كبار وعاملين شغل هايل وتسلم ايدكم على تعبكم ومجهودكم واسف مرة تانية لو قلت كلمة عن دون قصد وزعلتكم.
– للسنة الخامسة على التوالي أعيد وأكرر ، اللي بأكتبه ده مجرد ملاحظات ويوميات رمضانية، مش نقد مش نقد مش نقد.
– مش شرط لما حضرتك تكون بتعرض ٥ مسلسلات في القناة بتاعتك واشكر في ٤ واهاجم واحد لأنه وحش وسيئ فعلا ، ابقى مغرض ومدفوع ومزقوق ومبفهمش وبستظرف وتنسى اللي قولته بحق المسلسلات الباقية.
– مش شرط لما حضرتك تنتج أربع أو خمس أو ست مسلسلات ان كلهم ينجحوا ، ومش شرط عشان واحد أو اتنين نجحوا منهم تنسى تعالج الخلل اللي ظهر في باقي المسلسلات.
– مش شرط عشان ربنا كرمك بمسلسل أو برنامج نجح تفتكر ان كده القناة بتاعتك بقت رقم ١ ، سيبك من المطبلاتية اللي حواليك واشتغل على النجاح اللي اتحقق ومتكتفيش بيه ، وشوف نقاط ضعفك فين وعالجها.
– قناة يعني خريطة متكاملة، يعني مضمون ، يعني اعرف اجيب أرباح أو على الأقل مخسرش ، يعني بروموهات ، يعني جرافيك ، يعني هوية ، يعني تخرج من اللي شغالين معاك أحسن ما فيهم ، يعني ريسك ومخاطرة ومغامرة .. مش مجرد شرايط وحلقات بتبعتها شركات انتاج المسلسلات وحضرتك بتحطها على السيرفر وبتعرضها وخلاص.
– مش شرط رأيك يكون دايما صح ومش شرط رأيي يكون دايما صح ، ومش شرط اللي يعجبك يعجبني أو العكس ، ومش شرط اللي ميعجبكش ولا يعجبني أنا كمان ، ميكونش عاجب ١٠ مليون واحد غيرنا شايفين انه حلو ومحصلش ، المهم نخلى صدرنا واسع ونفسنا طويل وعقلنا كبير ونستوعب ان ربنا خلقنا مختلفين.
– أيوب .. للحلقة الخامسة على التوالي المسلسل عبارة عن .. دياب عايز بوسة مشبك .. محمد لطفي بيتهزق من ميريهان حسين ، مصطفى شعبان وزكي فطين عبدالوهاب بيخططوا ويوشوشو بعض ، من 4 إلي 5 يا روح أمك متوزعين على ابطال العمل .. وحلو أوي على كده.
– هشام سليم “طايع” .. جمال عبدالناصر (اليوم السابع) “أيوب” .. أحمد الهواري (وشوشة) “رحيم” .. كارمن لبس “عوالم خفية” .. أنتصار “عوالم خفية” .. أبرز ضيوف الشرف اليوم.
– يوم في حب مصر .. تغطية أكتر من ممتازه على مدار 24 ساعة لتاريخ مصر في المونديال على bein max .. تحية لكل فريق العمل بقيادة البروديوسر محمد فوزي والبروديوسر علاء الدكر والمراسل أحمد نوير.
– طايع .. خير اللهم اجعله خير مفيش حد اتقتل في حلقة النهارده.
– طايع .. مشهد خروج الرصاصة من جسم عمرو يوسف، من المشاهد الحلوة اللي تحسب لعمرو سلامة.
– طايع .. مي الغيطي .. نضج وتطور مستمر.
– فوق السحاب .. أول مشهد لمنى عبد الغني في مصر من بداية المسلسل.
– فوق السحاب .. عصابات خطف الأطفال ، واحدة من أهم القضايا اللي ناقشها المسلسل في حلقاته الأخيرة.
– فوق السحاب .. إخراجيا ، مشهد تصفية إيهاب فهمي في بلجيكا ، اتعمل واتنفذ حلو.
– فوق السحاب .. شفتوا لما بيكون في حاجة حلوة بقولها إزاي؟
– لعنة كارما .. هيفا كانت بتعمل تمارين ، جت تفتح الحوض أول مره معرفتش ، لكن هيفا مستسلمتش حاولت مرة تانية ونجحت.. برافو يا هيفا.
– رسايل .. أفضل حلقات المسلسل من بداية رمضان.
– رسايل .. في حلقة النهاردة تحديدا مي عز الدين بتثبت انها ممثلة كبيرة.
– عوالم خفية .. سارة نور من الوجوه الجديدة المبشره في دراما هذا العام.
– عوالم خفية .. فتحي عبدالوهاب ونور قدري .. من أكتر العلاقات الكوميدية نجاحا في رمضان السنة دي.
– رحيم .. أكبر عدد ماستر سيين في حلقة واحدة.
– بالحجم العائلي .. محمد رمضان كان فرحان بالمشهد اللي بيضرب فيه واحد من رجالة هتلر بيه 3 أقلام وعملها أغاني وكليبات ، النهاردة ميرفت أمين ضربت عمر حسن يوسف 4 أقلام وعادي جدا مفيش أي حاجة.
– بالحجم العائلي .. اعتبرها نصيحة من صديق ، المشكلة يا أحمد كرارة والله ان جسمك مش حلو عشان كل حلقة تطلع وانت topless كده.
– مصطفى أبو سريع طلق مراته “قانون عمر” ، وآسر البدراوي طلق مراته “نسر الصعيد” ، ومحمد شاهين عرض الجواز على نسرين أمين “ممنوع الإقتراب أو التصوير”.
– محمد جمعة “ضد مجهول ” ينافس دياب “أيوب” وسامي مغاوري “رحيم” .. على لقب المحامي الأقذر في رمضان الحالي.
– مصطفى فهمي ينجو من محاولة قتل “مليكة” ، وايمان العاصي تنجو من محاولة قتل “قانون عمر”.
– لدينا أقوال أخرى .. المخرج محمد علي يضرب الرقم المسجل باسم المخرج ياسر سامي ، ويعيد 11 مشهد من حلقة امبارح في بداية حلقة النهارده.
– لدينا أقوال أخرى .. هو الظابط وأمين الشرطة اللي يسرا هربت منهم ، كانوا عارفين انهم بيصوروا مشهد بجد ولا بيعملوا كاستينج؟
– لدينا أقوال أخري .. هي قناة ايه دي ، اللي أول خبر في نشرة أخبارها مبيكونش عن الرئيس أو الحكومة ، وبيكون عن هروب سجينة من مستشفى المجانين؟
– ضد مجهول .. يا مهون حدث جديد أخيرا، المفروض ان محمد كيلاني هايكتشف بكره ان مراته بتحب جوز أخته .. قولوا يارب.
– نسر الصعيد .. خبر سار : محمد رمضان ضرب درة ومشيت وسابت له البيت.
– نسر الصعيد .. أحمد خالد صلاح هايكون التريند رقم 1 بكره.
– أيتن عامر كانت قاعدة في أوضه عند عمتها وسابتها واجرت فيلا ” أيوب” ، عبلة كامل كانت قاعدة في فيلا وسابتها واجرت أوضه فوق السطوح “سلسال الدم”.
– كلبش .. صلاح عبد الله حالة الوفاة رقم 90 في المسلسل.
– كلبش .. أمير كرارة وصل في تقمص شخصية سليم الأنصاري لدرجة اني احيانا بأنسى أنه أمير كرارة أصلا.
– ليالي أوجيني.. أمينة خليل جابت قلم هدية لظافر العابدين .. ملخص حلقة اليوم.
– اختفاء .. في يوم واحد محمد ممدوح اتعلم رقص تانجو من نيللي كريم “نسيمة” ، وعلم نيللي كريم “فريدة” رقص التانجو.
– اختفاء .. بدون مبالغة ، محمد ممدوح ممثل عالمي.
– أبو عمر المصري .. الحلقة كلها عبارة فاصل من التدريبات القتالية والأيروبكس والميديتاشن برعاية أحمد عز.
– أبو عمر المصري .. الممثل الصيني أو الكوري او الياباني هايل ، بس للأسف مسمعتش ومفهمتش نص كلامه.
– شيك في اليد خير من بضاعة بايرة .. صبري فواز “رحيم”.
– العشق بيزل زيه زي الكيف بالظبط .. مصطفى منصور “كلبش”.
– معقوله اب يتكسف يقول لاولاده اقفوا جنبي لو حتى بكلمة أو طبطبة .. مي عز الدين “رسايل”.
– ياما في نهايات ، بتبقى بدايات لحاجات جديدة و أحلى .. محمد ممدوح “اختفاء”.
– في ستات وشها من غير مكياج شبه وش رجلي بالظبط .. زينه ” ممنوع الإقتراب أو التصوير”.
– الملايكة مابتنزلش على الأرض .. كلنا بني آدمين وربنا بيبعتنا لبعض.. أمير كرارة “كلبش”.
– ربنا يرحمك يا أمي ويرحم أمهاتنا جميعا ويحفظ أمهاتكم يارب.