عبد الله غلوش يكتب: غلوشيات رمضانية (19)
– المسلسلات كلها بدون إستثناء ، بدأت في رفع شعار : زق معانا الشهر.
– زمان كانت إعلانات الكحك هي اللي بتحسسك ان رمضان قرب يخلص ، الأيام دي بيجيلك الإحساس ده أول ما تشوف المحلات شالت الـ kaftan وحطت الكاش مايوه مكانه.
– رحيم .. واحدة من أضعف حلقات المسلسل.
– إعلان 57357 ، حتى وهو صعيدي ، الشاب خالد مبهج.
– طايع .. عمرو يوسف ، الصراحة اجتهد وعمل اللي عليه وجاب أخره في التمثيل في المسلسل ده ، بس نقول ايه ، القبول ده بتاع ربنا.
– طايع .. سلوى محمد على مهما كان المشهد صعب ، تحسها بتعمله بمنتهى البساطة والسهولة.
– أبو عمر المصري .. التترات وكليب في الحلقات السابقة والمشاهد اللي اتعادت من حلقة امبارح ، وقتهم كان أكبر من الوقت الفعلي لحلقة النهارده.
– أبو عمر المصري .. أحمد العوضي ، موهبة كبيرة واكتشاف في اللغة العربية.
– أبو عمر المصري.. صبري فواز تحسه مولود إرهابي.
– أبو عمر المصري .. سلسلة أروى جودة أطاحت بـ محمد جمعة خارج المسلسل.
– كلبش .. غابت جميلة عوض ، وعادت راندا عوض.
– كلبش .. الحلقتين اللي ظهر فيهم صلاح عبد الله في المسلسل ، أبرك من دوره في مسلسل “عوالم خفية” بالكامل.
– فوق السحاب .. واضح ان المخرج اعجب بلقطة عفاف شعيب وهي بترجع فقرر يعيد نفس المشهد مرتين في حلقة النهاردة.
– فوق السحاب .. ماتش الأهلي والزمالك جريمة إخراجية متكاملة الأركان ، اللاعيبه في ستاد والجمهور في ستاد تاني ومدحت شلبي بيعلق على ماتش تالت ، وبعدين أول مرة أشوف الألتراس بيقعد في المقصورة الحقيقة.
– فوق السحاب .. إذ فجأة من ساعة ، لقيت ع الفيسبوك أكتر من 30 واحد دخلوا يشتموني بألفاظ تليق باللي شاريهم عشان بأنتقد المسلسل ، مش مضايقني بس غير إن كلهم من أكاونتات فيك.
– فوق السحاب .. لما اتعمل مشهد انفجار العربية الجيب حلو قولت ، زي ما قولت ان المسلسل من اجرأ مسلسلات رمضان .. بس لما بيبقى في حاجه غلط أو مش عجباني مبعرفش مقولهاش.
– إعلان رسالة..” احنا اتركنا لما اتهرينا” ، بيثبت انك لما تعمل إعلان بسيط وفكرته حلوة ، أحسن مليون مرة من لما تجيب نجوم كبار ومتعرفش تعمل بيهم حاجة.
– ليالي أوجيني .. صوت أم كلثوم في أغنية “حبيبي يسعد أوقاته” .. أجمل ما في حلقة اليوم.
– ليالي أوجيني .. إنجي المقدم عرفت ان ظافر العابدين بيخون صاحبتها .. أبرز أحداث حلقة اليوم.
– الرحلة .. فكرة معرض “وش وظهر” حلوة ، وهتبقى موضة معارض فنية كتير بعد رمضان.
– الرحله .. قناة الشركة المنتجة للمسلسل بتستخدم كلمة بدون حذف في وصف حلقاته على اليوتيوب ، اتفرجت على حلقة النهاردة على قناة الشركة ونفس الحلقة على قناة dmc وملقتش حاجة محذوفة بين الإتنين غير تتر النهاية فقط.
– بالحجم العائلي .. مط وتطويل بالحجم العائلي.
– بالحجم العائلي .. موبايل أحمد كرارة رن مرتين .. في الكادر من بعيد كان بيظهر رقم غريب من غير اسم ولما كلوز كان بيظهر على الشاشة اللي بيتصل واحدة اسمها لورا.
– بالحجم العائلي .. الفرق بين عمر حسن يوسف وأحمد كرارة في المسلسل .. الأول جيجولو مصري والتاني جيجولو أجنبي.
– بالحجم العائلي .. وجه الشبه بين عمر حسن يوسف وأحمد كرارة في المسلسل .. الاتنين ملهمش في التمثيل.
– أيوب .. عايزين تحافظوا على نجاح المسلسل، قللوا من مشاهد محمد لطفي وميريهان حسين.
– أيوب .. حسني شتا ابن سلوى عثمان الصغير .. واحد من أفضل الوجوه الشبابية في رمضان الحالي ، بيخطف الكاميرا من أي حد معاه في كل المشاهد اللي ظهر فيها.
– نسر الصعيد .. جوز أخت درة دفع مؤخر مليون جنية لطليقته، رغم انه من حلقتين كان بيقولها مش معايا 400 دولار اجيب شغالة أجنبية.
– نسر الصعيد .. محمد حاتم من الممثلين القليلين اللي لازم يسيبوا بصمة في كل الأدوار اللي بيعملوها.
– نسر الصعيد .. محمد عز رفض اغراءات دينا ، النيابة اخلت سبيل سيد رجب .. درة طلعت هي اللي مبتخلفش وزين القناوي سليم وزي الفل.
– لدينا أقوال أخري .. سلمى أبوضيف اتطلقت رسمي .. هدى المفتي فسخت خطوبتها رسمي .. يسرا المحكمة لغت حكم الاعدام وحولتها على مستشفى الأمراض العقلية.
– لدينا أقوال أخري .. أول مشهد يجمع بين يسرا وشيرين رضا من بداية المسلسل.
– اختفاء .. أفضل حلقة من بداية رمضان .. أفضل حضور لهشام سليم من بداية المسلسل .. أفضل حلقة 19 بين كل المسلسلات.
– اختفاء .. في حلقة واحدة نيللي كريم فريدة دخلت السجن ونيللي كريم نسيمة كمان دخلت السجن.
– رسايل .. واضح ان مها أحمد ركزت في تقديم البرامج جامد لدرجة انها نسيت التمثيل.
– رسايل .. هشام إسماعيل من أكتر الكوميديانات اللي لما بيعملوا تراجيدي بصدقهم.
– شيخ الحارة .. واحد من أفضل الحوارات اللي عملها أحمد حسام ميدو خلال الفترة الأخيرة.
– ضد مجهول .. الحشو مستمر.
– ضد مجهول .. حنان مطاوع ، أجمل ما في المسلسل.
– ضد مجهول .. جارة دياب بعد ما خلصت كلامها معاه قالت له تصبح على خير مع ان الدنيا كانت لسه نهار.
– انتي أول حاجة في حياتي تستاهل اني اكتبها واحكيها .. ظافر العابدين “ليالي أوجيني”.
– النمر الكائن الوحيد اللي بيفضل باصص في عين خصمه لاخر لحظة حتى لو كان بيموت.. محمد ممدوح “اختفاء”.
– ساعات لحظات الجنون بتبقى هي عين العقل أحمد سعيد عبدالغني “رسايل”.
– ربنا يرحمك يا أمي ويرحم أمهاتنا جميعا ويحفظ أمهاتكم يارب.