مارينا المصري تكتب: دراما كوين (16)

كل سنة وانتم طيبين، رمضان كريم، وفي “دراما كوين” هجيبلكم كل يوم أبرز المقولات اللي سمعت في ودني، من كل مسلسل، واللي شايفة إن بعضها هيعيش معانا سنين قدام، وتعليقي عليها، وحقيقي تسلم إيد السيناريست.

نرشح لك : مارينا المصري تكتب: دراما كوين (15)

1- بالحجم العائلي

– “انا واحدة حركتي تقيلة وقلبي خفيف”

انا واحدة حركتي خفيفة وقلبي تقيل

– “المكونات هي هي والطعم مختلف”

الرك على النفس

———————

2- اختفاء

– “انا مواطنة عادي وعايزة اعمل بلاغ ان موبيلي محدش بيتجسس     عليه”

ياه ما حلو ده نعمله كلنا…. المشكلة ان نيلي كريم راحت لواحد عرف موبيلها حد متجسس عليه ولا لا في ثانية و ولا حتى اهتمت تسأله عرفت ازاي وريني…. ليه كدة يا نيللي ما تفيدي جمهورك

———————

3- ابو عمر المصري

– “حتى البقر ماركات”

والبني أدمين كمان للأسف

———————

4- ايوب

– “انت تاخدي جمال البنطلونات”

 اعلى معاكسة السنة دي

– “القانون ده للفهم مش للحفظ”

 القانون لا يحمي الاغبياء

– “اخدان الحق مفيهوش معلش”

نكتبها في الشغل دي

———————

5- رحيم

– “الأهل في بينهم عتاب إنما عمر ما يكون في بينهم زعل”

   اهلك سندك متخيرهمش

– “الإتنين بيحبوني.. رحيم بيحبني ومش مستني أي مقابل وعارف إن     بكرة ممكن مبقاش معاه لكن عماد بيحبني كأني اللعبة بتاعته اللي   مينفعش حد يأخدها منه.. وده ما اسموش حب ده مرض وملوش علاج”

مرض و معدي خلي بالك من قلبك

– “ساعات الاجابات بتيجي لوحدها… في بعض الأسئلة مش محتاجة     اجابات علشان يتجاوب عليها”

مجرد طرح السؤال اجابة

– “متفتكرش إن كل حاجة في دماغك هي الصح”

اللي يفهم كدة ينجح

– “الفلوس بتذل البني أدمين”

وتريحهم برضه

– “إحنا جوا لعبة كبيرة محدش فاهمها غير اللي مدورها وبيبص علينا من فوق”

يارب هو نفسه يكون فاهمها

– “كل الناس مخبية وشها بوشوش تانية كلها كدب وتمثيل”

الناس الواضحة انقرضوا