مارينا المصري تكتب: دراما كوين (15)

كل سنة وانتم طيبين، رمضان كريم، وفي “دراما كوين” هجيبلكم كل يوم أبرز المقولات اللي سمعت في ودني، من كل مسلسل، واللي شايفة إن بعضها هيعيش معانا سنين قدام، وتعليقي عليها، وحقيقي تسلم إيد السيناريست.

نرشح لك: مارينا المصري تكتب: دراما كوين (14)

أبو عمر المصري

– “المصايب كلها بتتلم في وقت واحد”.

نفسي اعرف ليه لما بتضيق بتضيق مع بعض ليه مفيش حاجة تشيل حاجة وكإن دايمًا الحزن لما بيكسب بيكسب بفرق كبير!! تفتكر لما تزعل وتضيق تضيق من كله علشان لما تفرج تفرج من كله فتفرح بجد؟ ولا دايمًا في الحزن بنتمنى إنه يكون نص العمى ولا العمى كله؟ ولا يمكن العيب فينا؟ يمكن لما بنزعل مش بنشوف غير الزعل!

– “شيرين كانت غريبة الشهور الاخيرة كانت رجل جوة ورجل برة، الرجل اللي برة واقفة مستنية تعرف إيه اللي هيحصل يمكن تدخل، بس اللي حصل بقى ان الرجل اللي جوة هي اللي خرجت”

ساعات احنا اللي بنختار الموت مش هو اللي بيجيلنا.

 

– “هو في ظلم الرد عليه بضرب النار حلال؟”

رد المظالم بعدالة القانون مش بضرب النار..

– “الزمن مابيغيرش غير اللي سايبله نفسه”.

بس ساعات الوجع بيغير وفِي ناس مبترجعش لطبيعتها بعد ما تتألم، يمكن نقدر نحافظ على جزء صغير من إنسانيتنا من الزمن، يمكن.

 

– “اللي انت شايفه شر دلوقتي دور على خير اللي جواه”.

كل الأشياء تعمل معاً للخير للذين يحبون الله، هم أرادوا لي شرا والرب أراد لي خير.

 

– “انت عمرك ما كنت مجبر، طول عمرك ماسك لجامك في إيدك”.

انت حر والحريّة كاملة.. مفيش نص حرية خليك حر..

طايع

– “الأم بتحب ولادها أول ما تحمل فيهم لكن الأب أول ما يشوفهم”.

نظرية غريبة مش عارفة صح ولا لأ بس المشكلة إن في أهالي أمهات وأبهات مبتحبش ولادها لما بتجيبهم وتشوفهم، نظرية مش منطقية بس حقيقية..

بالحجم العائلي

– “بتحصل تلاقي نفسك ماشي ورا مشاعرك وهي اللي حبساك، تحس إنك فوق الدنيا دي كلها ومش عامل حساب لأي ظروف ومش عايز دماغك تفرملك وتقولك لأ”.

الصراع بين عواطفك وعقلك هو صراع أبدي يعني منه معظم البشرية وهو السبب الرئيسي في الوقوع في حب وعلاقة خاطئة غالباً هتكون هي الحب الحقيقي الوحيد في حياتك ووجعك اللي مش هتعرف تهرب منه.

– “ولاد مع أب وأم منفصلين وكل واحد في حاله، أحسن من ولاد مع أب وأم مش طايقين بعض”.

والله العظيم النظرية دي صحيحة جدا المشكلة إن ليه بنجيب عيال من الأساس لو هنوصل لكدة او ليه اتجوزنا اصلا!! اه ممكن تكون النظرية اللي فوق انتهت بجواز … اوك.

رحيم

– “أحسن وقت تضرب فيه حد لما يكون قلقان”.

أو متحامي فيك!!

 

ليالي أوجيني

– “مش هنعرف نسعد حد واحنا اصلا تعساء”

الحقيقة إن فاقد الشيء يعطيه وأكتر الناس اللي فرحتني في حياتي كانوا في قمة التعاسة ولكن حنينين وبيحبوا بجد..

– “الكلام لو ضايقك أوي كدة معناها إنه كان في حاجة صح”.

صح! وياما في كلام هزار بيبقى في كلام جد وياما في الكلام اللي مش مقصود بيبقى في كلام قصد وياما في الخناق بيبقى في كلام حب وياما في الحب بيبقى في كلام كره وياما وياما وياما…

– “مفيش بين الراجل وجماعته كرامة”

لا فيه طبعا