مارينا المصري تكتب: دراما كوين (14)

كل سنة وانتم طيبين، رمضان كريم، وفي “دراما كوين” هجيبلكم كل يوم أبرز المقولات اللي سمعت في ودني، من كل مسلسل، واللي شايفة إن بعضها هيعيش معانا سنين قدام، وتعليقي عليها، وحقيقي تسلم إيد السيناريست.

نرشح لك: مارينا المصري تكتب: دراما كوين (13)

1- أبو عمر المصري

– “انت الإنسان الوحيد اللي بيديني طاقة علشان اتنفس”.

برغم إن تعليق فرحتك وحياتك بحد غباء ولكنه المعني الحقيقي للحب.. فالحب هو قمة الغباء في بعض الأوقات.

– “وادي جزات اللي ميسمعش كلام أبوه ويعند.. يجيلوا ضربة شمس”

الله يرحمك يا بابا

2- بالحجم العائلي

– “ال decency اللي انت فيها دي ما تكلش مع البنات.. الواد الخجول ده زمن وعدى”.

الواد الخجول من كتر ما شح أوي اليومين دول الطلب عليه زاد..

– “هي أيه اكلة الفجورة دي؟”

كم الأكلات اللي مش عارفها في مسلسلات رمضان السنة دي رهيبة

– “طانت دي يتعملها تمثال في الشر والزنبقة”.

لا احنا نعمل متحف بقى

– “الطبطبة والحنية مفتاح أي حاجة في الدنيا”.

وبالرغم من كدة مش بنطبطب! مش بتطبطبوا ليه؟!!

– “لذة اللحظات المسروقة”

الحرام ليه طعمه برضه

– “الجواز من غير حب ملوش طعم”

وياما ناس تاكل علشان الجوع من غير ما تستطعم

3- رحيم

– “الستات عاملة زي الجبنة الرومي كل ما تقدم تحلى”.

والرجالة عاملة زي الفيلم، في فيلم تتفرج عليه ١٠٠ مرة متزهقش وفِي الفيلم ليه نهاية تحرقها ومتشفوش تاني..

4- أيوب

– “اعتبريني مكنة ATM ماشية وراكي”

أنا نفسي حد يقولي الجملة دي

– خفي مصايب شوية

* ونبي لو خفيت مبقى سماح

كل مصيبة تبين طيبة

– “وبعدين يا دنيا هتعملي ايه تاني لو فيكي حيل فأنا فيا حيلين”.

– “دراعك وقرشك وقبليهم دماغك”.

والله ما بالفلوس.. الفلوس مع التيوس

– “ومين ما بيتغيرش في زمنا ده؟”

كلنا اتغيرنا بس في ناس تتغير مع بعض وناس تتغير على بعض

5- ليالي أوجيني

– “مالك بقى عاملة زي تلميذة مدراس الراهبات؟”

مالهم بقى؟ أنا من مدرسة القديس يوسف للراهبات وافتخر فاهمين الحلم والحريّة ومصدقين في السكة الصح.

– “محدش بياخد كل حاجة، كل خطوة بتاخديها لفوق بتدفعي قصادها حاجة”.

ويا ترى انت دفعت أيه؟

– “بلاش كل ما نيجي نهون على بعض نلاقي حاجة تصعبها علينا كلنا”.

ما تيجوا نشتغل على الجملة دي ما تيجو نهون على بعض

– “انا لوحدي حتى وانا وسط الناس ودوشتهم”.

في ناس حواليهم وحيد وفِي ناس سيرتهم بس ونس.

6- كلبش ٢

– “القتل مفيهوش خيار و فقوس”

الحاجة الوحيدة اللي فيها ضمير للأسف