مارينا المصري تكتب: دراما كوين (13)

 

كل سنة وانتم طيبين، رمضان كريم، وفي “دراما كوين” هجيبلكم كل يوم أبرز المقولات اللي سمعت في ودني، من كل مسلسل، واللي شايفة إن بعضها هيعيش معانا سنين قدام، وتعليقي عليها، وحقيقي تسلم إيد السيناريست.

 

نرشح لك: مارينا المصري تكتب: دراما كوين (12)

 

1- بالحجم العائلي

– “الكبار من حقهم يعملوا اللي هما عايزينوا”

والصغيرين كمان، أصل لو متعلموش يعملوا اللي هما عايزينه من صغرهم هيعملوه إزاي لما يكبروا!!

– “ليه الإنسان بيقعد يكرر نفس الخطأ أكتر من مرة هل ده غباء ولا قدر ولا لعنة؟”

غباء أو طيبة أو غباء خلاه ملعون أو يمكن ميعرفش إنه بيكرره او مش عارف يبطل يكرره! يوه بقى مش عارفة..

– “الست دي ملح.. موجودة على كل الترابيزات مينفعش تأكلها لوحدها ولا ينفع تاكل منغيرها لأنك مش هتستطعم الاكل“.

الأكل لو طبخة حلوة مش هتحتاجلها ملح طربيزة والست الشاطرة تكون طبخة مظبوطة مش هتحتاج تملح زيادة إلا لو انت ضغطك واطي أو انت ….!!

 

2- اختفاء

– “الناس في البلد دي مش عايزين شفافية عايزين بطولة حتى لو مش حقيقية“.

للأسف بنسبة كبيرة أه

 

3- أبو عمر المصري

– “حبتني ولا حبيت حبي ليك؟”

اعتقد السؤال ده اتسال من نص بنات مصر واعتقد حب حبك ليه.

– “العناد مع الصحرا خطر”

العناد مع الصحرا فرصة للحياة..

 

4- كلبش ٢

– “اللي يضرب أولاني يضرب تاني”

بس يا ترى بنفس القوة؟

– “اللي يبيع صاحبه علشاني يبيعني لو الظروف حكمت يا سعيد“.

إعمل كل حاجة غلط إلا إنك تخون واحد صحابك.. تيتو

 

5- أيوب

– “ذنبك بتخلصيه في دنيتك علشان انت مش قد عذاب الآخرة“.

تخليص الذنوب في الدنيا بيخلي الدنيا نار جهنم وكإننا موتنا بالظبط..

– “اوعاك تنخ أو تجيب ورا مدام قررت تبقى قوي والقوة في الدماغ والفلوس قبل ما تبقى في العافية والدراع“.

القوة في الدماغ بس.. ياما فلوس مع تيوس..

– “خليك عفي.. الدنيا تصفالك والناس تكش منك“.

متخفش من الضعف، عمرك ما هتبقى عفي بجد غير لما تضعف بجد

 

6- ليالي أوجيني

– “الدنيا جاية علينا كفاية بلاش نبقى إحنا وهي على بعض“.

الناس اللي بتعمل الجملة دي هما انضف ناس أمسك فيهم.. لو لقيتهم

– “هي الناس ليه بتحب حد وبعدين تقعد تبكت فيه على اختياراته تحاول تغير فيه ما من الأول يا نختار حد شبهنا يا اللي مش شبهنا نسيبه لحاله، إنما تحب حد ويبقى مش قادر توافق عليه ده يبقى جنان”

ويفضل السؤال الجدلي هل اللي بيحب حد بيتغير علشانه؟ ولا الحب يعني القبول وهي لكشة واحدة اخدك كدة على بعضك بسلطاتك بكلك يا بلاش؟!

– “خليكي صريحة مع نفسك علشان تعملي اللي في مصلحتك“.

الصراحة راحة وذكاء يؤدي للنجاح

 

7- طايع

– “يا عيني على الرجالة لما تخيب“.

حزن بعيد عنك